व्यवसायी जुइगु लक्ष्यय् पूर्वकुमारी

झिप्यदँ–झिंन्यादँति न्ह्यव उबलय्या कुमारी माजुया किपा दुगु पोस्टकार्ड छपाः पिहां वःगु । उगु पोस्टकार्ड तसकं लोकंह्वात । पोस्टकार्डय् खनेदुुम्ह हिसिचा दुम्ह उबलय्या कुमारी माजु खः– प्रिती शाक्य । वि.सं. २०५८ सालय् स्वदँत्या दुबलय् कुमारी जुयाबिज्याःम्ह प्रिती थौंकन्हय् नीनिदँय् क्यनेधुंकल, अय्नं उगु पोस्टकार्ड उतिकं हे लोकंह्वाःनि ।

तस्बिर कायेके यःम्ह पुलांम्ह कुमारी प्रिती थौंकन्हय् नं थःगु तस्बिर कायेगुलि उतिकं हे शौखिन दु । अथे जूगुलिं वय्कःया फेसबुक वालय् नं थीथी पोजय् यक्व हे किपा खंकेफइ । तस्बिरया शौखिन जूसां वय्कःया फिल्मय् थ्यंक म्हितेगु धाःसा इच्छा मदु । ‘जितः तस्बिर काये तसकं यः, अय्सां फिल्मय् धाःसा वनेगु बिचाः मदु । फिल्मय् क्यारियर दयेकेफइगु अवस्था हे मदु’ वय्कलं धयादी ।

‘मोडलिङ्ग ले ?’
‘खास हे इच्छा मदु, तर अय्नं लिपा छु जुइ धायेमफु । तर आःया जिगु आज्जु धाःसा ब्यालर छगू निं क्वचायेकेगु खः,’ वय्कलं धयादी । वय्कः थौंकन्हय् प्राइम कलेजय् बिबिएस प्यंगू दँय् ब्वनाच्वनादीगु दु ।वय्कःया बाज्या, अबु, कका धाःसा लोकंह्वाःपिं कलाकारपिं खः । वय्कःपिनि पुस्तैनी ज्या पौभाः च्वयेगु खः ।

वय्कःया बाज्या सिद्धिमुनि शाक्य ला नेपाःया न्हापांगु नोट डिजाइन यानादीम्ह खः । वय्कलं वि.सं. २००२ सालय् न्यातका, झितका व सछि वंगु नोट डिजाइन यानादीगु जुयाच्वन । अथेहे वय्कःया अबु सुरेन्द्रमान शाक्य नांजाःम्ह पौभाः चित्रकार । बाज्या अबुया हे ज्या नालादीम्ह प्रितीया तता प्रिया नं थौंकन्हय् पौभाःया लोकंह्वाःम्ह चित्रकार जुयादीधुंकूगु दु ।

प्रिती धाःसां पौभाः च्वयामदी । ‘पौभाः च्वयेगु धयागु करं च्वये फइमखु, पौभाः च्वयेत ला मनं निसें इच्छा दयेमाः’ वय्कःया अबु सुरेन्द्रमान शाक्यं धयादी । अय्सा प्रितीया इच्छा ले ? ‘जिगु लक्ष्य ला नांजाःम्ह व्यवसायी जुइगु खः’ पुलांम्ह कुमारी प्रितीं थःगु नुगलय् दुगु इच्छा प्वंकादिल । थुकिया निंतिं वय्कःया ध्यान थौंकन्हय् पूवंक ब्वनेगुली हे वनाच्वंगु दु ।

तस्बिरया शौखिन थें न्ववायेगु, खँल्हायेगुलि नं उलि हे शोखिन जुयादी पूर्वकुमारी प्रिती । थःत थःम्हं ‘एक्स्ट्रा वर्ड’ अथे धयागु अप्वः खँल्हायेमाःम्ह धकाः म्हसिका बियादीम्ह प्रितीया खँल्हाये बानीया हे कारणं गनं नं म्हाइपु मताः । कुमारी जुयाच्वनादीबलय् गुबलें म्हाइपु मताः धयादीम्ह वय्कलं धयादी, ‘जितः गुबलें नं कुमारी छेँ नं पिहां वने धया थें मजू ।

मचां निसें हे जि न्ह्याथाय् नं ‘एडजस्ट’ जुइफु ।’थ्व हे बानिं वय्कःयात कुमारी छेँनं पिहां वयेधुंकाः स्कुल, छेँय् नं याकनं घुलमिल जुइत अःपुल । ‘कुमारी छेँ नं पिहां वयाबलय् सुरु ला छु मछिं थें छु मछिं थें जूगु खः । तर छेँजःपिनि ग्वाहालि याकनं हे ‘एडजस्ट’ जुल ।’प्रितीया आः नं कलेजय् यक्व पासापिं दु । थुकिया कारण थःगु ‘एक्स्ट्रा वर्ड’ बानिं हे खः ।

वि.सं. २०६५ सालं कुमारीं निवृत्त जुयादीम्ह वय्कःयात कुमारी छेँ नं पिहां वयेबलय् धाःसा तसकं ख्वये वःगु जुयाच्वन । ‘च्यान्हु झिन्हु न्ह्यव हे आः कुमारी छेँ नं पिहां वनेत्यल धयागु सिउगु खः, तर उकियात उलि वास्ता मयाना । छेँय् लिहां वनेगु न्हि वःबलय् कुमारी छेँया निनिपिं सकलें ख्वया हल, अले जिं नं थःगु इमोशन कन्ट्रोल हे यायेमफुत’ कुमारी छेँय् नं लिहां झाःबलय्या ई लुमंकुसें वय्कलं धयादी ।

कुमारीपाखें निवृत्त जूगु झिदँ दयेधुंकूसां वय्कः इलय् ब्यलय् कुमारी छेँय् झाया हे च्वनादी । ‘कुमारी छेँ धयागु पुलांपिं कुमारीपिनिगु थःछेँ हे खः । नखःचखःबलय् जिमित नखत्या सःतेमाः । जिपिं इलय्ब्यलय् अन वनेगु हे यानाच्वना’ वय्कलं धयादिल ।

सम्बन्धित बुखँ

LEAVE YOUR COMMENTS