भ्वय्छेँय् स्कुलया क्यान्टिन !

येँ (नेपालभाषा टाइम्स)÷येँ मनपा १३ वडास्थित नील बाराही स्कुलं थःगु क्यान्टिन चायेकेत सार्वजनिक भ्वय्छेँ कब्जा यायेत्यन धासें स्थानीयवासीं विरोध याःगु दु । शनिवाः तखति अजिमा ख्यलय् जूगु स्थानीय मनूतय् भेलां भ्वय्छेँय् महानगरपालिकां ग्वःगु ताःफ्वः तछ्यानाः अन तयातःगु स्कुल क्यान्टिनया सामान लिकयाः स्कुल दुने हे तया बिउगु खः ।

उगु भ्वय्छेँय् स्थानीय युनाइटेड युथ क्लबया सामान तयातःगु खःसा वंगु वालय् नगर प्रहरीं सुयातं छुं जानकारी मबिसे क्लबया सामान ज्वना वंगु खः । क्लबया सामान यंकेवं अन स्कुल क्यान्टिनया सामान तये हःगु खः । सार्वजनिक रुपय् छ्यलेमाःगु भ्वय्छेँयात स्कुलं कब्जा यात धकाः स्थानीय जनता तम्वःगु दु ।