जात्रा क्वचाःगु लसताय् विशेष पुजा

यल- वंगु मोहनि नखःया इलय् जूगु मनमानेश्वरी भवानी जात्रा व पायः जात्रा सफलता पूर्वक क्वचाःगु लसताय् महालक्ष्मीस्थानय् छगू विशेष पुजा जुल । मोहनि नखःया झ्वलय् कौलाथ्व सप्तमि (फुलपाति) निसें कौलाथ्व एकादशि कुन्हु तक न्ह्याःगु भवानी व पायः जात्रा सफलतापूर्वक क्वचाःगु लसताय् महालक्ष्मी द्यःयाथाय् विशेष पुजा यासें प्रसाद वितरण याःगु खः ।

पुजा लिपा जूगु छगू ज्याझ्वलय् मनमानेश्वरी भवानीया मूछेँ आगंछेँया मू गुथिया साम्राज्यदेव श्रेष्ठं जात्रा संचालन यायेत विशेष ग्वाहालि याःगु धासें गुथि संस्थानया प्रमुख प्रशासक किरण शाक्य व यल महानगरपालिका १६ वडाअध्यक्ष निर्मलरत्न शाक्ययात मतिनाया चिं लःल्हानादीगु खः ।

ज्याझ्वलय् मूर्तिकार नरेशमान शाक्यं मू गुथ्याः श्रेष्ठलिसें थुगुसीनिसें जात्राय् दुथ्यानादीम्ह सुनिल श्रेष्ठ व सुहेल श्रेष्ठयात नं मतिनाया चिं लःल्हानादीगु खः ।
उगु इलय् मू गुथ्याः श्रेष्ठं परम्परागत सांस्कृतिक जात्रां निरन्तरता काःगु खँय् लसता प्वंकादिसें लिपा लिपा नं थुकथं हे ग्वाहालि दइगु आशा यानादिल । मूर्तिकार शाक्यं सांस्कृतिक परम्पराया जगेर्नाया निंतिं निरन्तरता बिया वनेमाःगु खँय् बः बियादिल ।

ज्याझ्वलय् यल महानगरपालिकाया प्रमुख चिरिबाबु महर्जन, उपप्रमुख गीता सत्याललिसें विशिष्टि व्यक्तित्वपिनिगु उपस्थिति दुगु खः ।

सम्बन्धित बुखँ

LEAVE YOUR COMMENTS