यलय् संक्रमितलिसें सीपिं अप्वयाच्वन
यल (नेपालभाषा टाइम्स) – स्वनिगलय् कोरोना संक्रमितया ल्याः न्हियान्हिथं अप्वया वनाच्वंगु दु। देशय् संक्रमितत थप जुयाच्वंगुलिइ स्वनिगलय्ज क न्हियान्हिथं बछिं मल्याक संक्रमित अप्वया वनाच्वंगु दु ।
स्वनिगः दुने दकलय् अप्वः येँय् संक्रमित दुसा अनं लिपा यल व ख्वपय् नं संक्रमितत न्हिथं अप्वया वनाच्वंगु दु। थ्व झ्वलय् यलय् संक्रमितया ल्याः अप्वया वनाच्वंगुलिसें कोरोनापाखें सीपिनिगु ल्याः नं अप्वयाच्वंगु दु। वंगु वाः तकया छगू तथ्यांककथं यलय् जक कोरोनां सीपिं ५० म्हं मल्याक थ्यनेधुंकूगु दु ।
थन कोरोना संक्रमितया ल्याः न्याद्वः स्वयां अप्वः दुसा सक्रिय संक्रमितया ल्याः नं नीन्यासलं अप्वः थ्यनेधुंकूगु दु। जिल्ला जनस्वास्थ्य ज्याकूयाकथं जिल्लाय् सक्रिय संक्रमितया ल्याः २५०७ म्ह दु। जिल्लाय् न्याद्वः स्वयां अप्वः संक्रमितमध्ये आतकया दुने कोरोनामुक्त जुयाः डिस्चार्ज जूपिं नीखुलं मल्याक ध्यनेधुंकूगु दु ।
आपालं मनुखं कोरोनाया ग्याःचिकु तंकाः छ्वयाच्वंगुलिं नं जिल्लाय् संक्रमितया ल्याः अप्वयाच्वंगु ज्याकूया प्रमुख डा. खगेश्वर गेलालं कनादिल । लिपांगु इलय् जिल्लाय् नं न्हियान्हिथं संक्रमितया ल्याः अप्वया वनाच्वंगु जक मखसे सार्वजनिक यातायात व लँय् जुइपिंसं नं उचित रुपं मास्कया प्रयोग यानामच्वंगु वय्कःया धापू दु। लिसें वय्कलं न्यूनतम आवश्यक स्वास्थ्य सुरक्षा मापदण्ड तकं पालना यायेगु ज्याय् सर्वसाधारणं बेवास्ता यानाच्वंगु धयादीगु दु। संक्रमितत छेँय् हे आइसोलेसनय् च्वनाबिल धाःसा याकनं नियन्त्रण काये फइगु वय्कःया धापू दु ।
महानगर दुने जक संक्रिय संक्रमितया ल्याः ३३४५ म्ह दुसा कोरोनामुक्त जुयाः डिस्चार्ज जूपिनिगु ल्याः १७३१ म्ह दु। उखे यल महानगरपालिकाय् जक संक्रिय संक्रमितया ल्याः थ्यंमथ्यं झिंखुसः दु। संक्रमितमध्ये नं मिजं स्वयां मिसातय् ल्याः आपालं दु। आतकया महानगर दुने सीपिनिगु ल्याः २७ म्ह थ्यनेधुंकूगु दु ।
जिल्लाय् कोरोनापाखें सीपिं अप्वःथें ५५ दँनिसें ६० दँ तकयापिं दु। यल जिल्लाय् लाःगु गोदावरी नगरपालिकाय् कुल संक्रमितया ल्याः ३८१ व महालक्ष्मी नगरपालिकाय् ३४७ म्ह दु। संक्रमित अप्वया वनाच्वंगु इलय् सर्वसाधारण स्वयं थःपिं हे सचेत जुइमाःगु सम्बद्ध व्यक्तितय्सं धाःगु दु ।
LEAVE YOUR COMMENTS