प्रहरी दमन विरुद्ध सदन अवरुद्ध

गृहमन्त्रीया स्पष्टीकरण माग यासें कांग्रेस आन्दोलित

येँ – गुथि विधेयक विरुद्ध आइतवाः नेवाःतय्सं याःगु प्रदर्शनय् जूगु सरकारी दमनया कारणं सोमवाः प्रतिनिधि सभाया बैठक स्थगित यायेमाल । प्रमुख प्रतिपक्षी नेपाली कांग्रेसया सांसदतय्सं सरकारी दमनयात कयाः गृहमन्त्री रामबहादुर थापां संसदय् लिसः बीमाः धकाः विरोध यायेवं संसद स्थगित यायेमाःगु खः ।

सभामुख कृष्णबहादुर महरां बैठक सुरु जूगु घोषणा यायेवं प्रमुख प्रतिपक्षी नेपाली कांग्रेसया सांसदतय्सं आइतवाः माइतीघरय् शान्तिपूर्ण
विरोध याःवःपिं गुथियारतय्त दमन याःगु धासें थःगु सिटंं दनाः विरोध याःगु खः । विरोध लिपा सभामुख महरां कांग्रेस संसदीय दलया प्रमुख सचेतक बालकृष्ण खाँणयात न्ववायेत ई बीवं वय्कलं आइतवाः माइतीघरय् जूगु दमन धर्म संस्कृति संरक्षणया माग यानाः संविधानकथं शान्तिपूर्ण विरोध प्रदर्शन यायेगु अधिकारया नं उपहास जूगु खँ धयादिल ।

‘संविधान अःखः बारम्बार विधेयक वयेगु याइ, उकिं बांलाक अध्ययन यानाः जक विधेयक हयेगु यानादिसँ, गुथिया अस्तित्व मदयेकेत स्वइगु नियमप्रति जिमिगु गम्भीर आपत्ति दु, सनातन धर्म संस्कृति संरक्षण जुइमाः’ वय्कलं धयादिल ।सत्तापक्ष नेकपाया सांसद पम्फा भुसालं आइतवाः माइतीघरय् जूगु दमनया विरोध यानादिल ।

गुथि विधेयक लित कयाः सहमतिपूर्वक न्हूगु विधेयक हयेमाःगु माग वय्कलं यानादिल । ‘बुंगद्यः थेंज्याःगु १ हजार ७०० दँ पुलांगु गुथिया संरक्षण यायेमाः, विधेयकय् वःगु व्यवस्था ठीक मजू, थुकी सहमति यायेगु कुतः जुइमाः’ वय्कलं धयादिल । नेपाली कांग्रेसया पुष्पा भुसालं स्वनिगलय् जक निद्वलं मल्याक गुथि दुगुलिं संविधानया गलत व्याख्या यानाः गुथिया जग्गा आक्रमण यायेत स्वःगु धासें आपत्ति प्वंकादिल ।

लिच्छविकालंनिसें न्ह्याना वयाच्वंगु धर्म संस्कृति संरक्षणया निंतिं गुथिया अस्तित्व मासे याये मदइगु खँ वय्कलं धयादिल । बैठकय् सत्ता व प्रतिपक्षया सांसदतय्सं सरकारं संसदय् दर्ता याःगु गुथि विधेयकया विरोध यासें लित कायेत माग नं याःगु खः ।सांसदतय् विरोध लिपा लिसः बीगु झ्वलय् भूमि व्यवस्था, सहकारी तथा गरीबी निवारण मन्त्री पद्माकुमारी अयार्लं संविधानं न्ह्यथनातःगु खँयात व्यवस्थित यायेत व एकरुपता हयेत गुथियात प्राधिकरणय् यंकेत स्वयागु खँ कनादीगु खः ।

थ्व झ्वलय् वय्कलं विधेयकयात संशोधन यायेत सरकार तयार दुगु खँ नं धयादीगु खः । ‘म्हिगः व आःया गुथि विधेयक तात्विक फरक मदु’ धासें वय्कलं धयादिल, ‘गुकथं पारित यायेगु धयागु माननीयतय् ल्हातय् दु, परिष्कृत यायेत सरकार तयार दु, सांसदतय्सं सनातन धर्म संस्कृति मासे जुइ धकाः गुगु चिन्ता प्वंकल, अथे याके बी मखु ।’

संविधानया छगू धारा व अनुसूची स्वयाः निष्कर्ष पिकाये मजिउ धासें मन्त्री अर्यालं धारा २९० यात टेके यानाः विधेयक हयागु स्पष्ट यानादिल । मन्त्री अर्यालया लिसलय् सन्तुष्ट जुइ मफयेवं प्रमुख प्रतिपक्षी दलया सांसदतय्सं माइतीघरय् जूगु दमनयात कयाः गृहमन्त्री रामबहादुर थापां लिसः बीमाःगु माग याःगु खः ।

सभामुख महरां गृहमन्त्री वयेवं लिसः बीके धाःसां प्रतिपक्षीपाखें दनाः विरोध यायेवं १५ मिनेट संसद स्थगित याःगु खः । थ्व लिपा गृहमन्त्री मवइगु जुइवं हाकनं सुचं तिकाः मंगलवाः ११ बजे तकया निंतिं बैठक स्थगित याःगु दु ।