लामिछानेया पद खारेज यायेत सर्वोच्चय् रिट
येँ (नेपालभाषा टाइम्स)- राष्ट्रिय स्वतन्त्र पार्टीया सभापति रवि लामिछानेया सांसद पद खारेज यायेत माग यासें सर्वोच्च अदालतय् रिट दर्ता जूगु दु । लामिछानेया नागरिकता विवादया खँयात कयाः युवराज पौडेल (सफलं) नर्वाचन आयोग लिसें न्याम्हेसित विपक्षी दयेकाः सर्वोच्चय् रिट बिउगु खः ।
लामिछानें २०५० सालया नम्बर १८२२२ या नागरिकता (नेपाल नागरिक ऐन, २०६३ या दफा १० (१) कथं कायम मजूगु नागरिकता) छ्यलाः दल दर्ता यायेगु ज्या निर्वाचन आयोगया त्रुटीं जूगु खँ रिटय् न्ह्यथनातःगु दु । उगु त्रुटि भिंकाः लामिछानेया दल तत्काल खारेज यायेमाःगु माग नं उकी यानातःगु दु ।
लामिछानें चितवन क्षेत्र नं. २ या उम्मेदवार जुइत निवेदन बिउगु व निर्वाचनया लिच्वः वयेधुंकूगु इलय् तक नं वैध रुपय् नेपाःया नागरिक मजूगु प्रष्ट जुइक जुइकं व निर्वाचनया परिणाम घोषणा मजुइकं योग्यता सम्बन्धय् लाःगु उजुरीयात निर्वाचन आयोगं हे निर्णय प्रष्ट व्यवस्था दयेक दयेकं कानुनी कर्तव्य पूमवंकुसे निर्वाचन परिणाम घोषणा जुइधुंकूगु धकाः बहाना दयेकाः थज्याःगु गम्भीर विषयसं निर्णय यायेगु दायित्वपाखें लिचिलाः अयोग्य व्यक्तियात प्रतिनिधिसभा दुजः दयेकेगु कथं मिति २०७९÷०८÷१३ सं निर्वाचन आयोगं याःगु निर्णय व लामिछानेयात प्रतिनिधिसभा दुजःया रुपय् मान्यता बीगु फुक्कं दस्तावेज लिसें प्रमाणपत्र उत्प्रेषणया आदेशं बदर यायेत नं रिटय् धयातःगु दु ।
LEAVE YOUR COMMENTS