प्रदेश १ या मुद्दा हानं सर्वोच्चय्

येँ (नेपालभाषा टाइम्स)- १ नम्बर प्रदेश सरकारया मुख्यमन्त्री उद्धव थापां सभाध्यक्ष इस्राइल मन्सुरीयात समेत मतदान याकाः विश्वासया मत काःगु कासें नेकपा एमालें सर्वोच्च अदालतय् मुद्दा तःगु दु ।

एमाले संसदीय दलया नेता हिक्मत कार्कीया वारेस जुयाः कानुन व्यवसायी दुर्गाबहादुर दाहालं संविधानया धारा १३३ (२), (३) कथं उत्प्रेरणयुक्त परमादेशया माग यासें सर्वोच्चय् रिट तःगु खः ।

कार्कीं प्रदेश प्रमुख परशुराम खापुङ, मुख्यमन्त्री उद्धव थापा, सभाध्यक्ष याःम्ह सांसद इस्राइल मन्सुरी, अध्यक्ष मण्डलया मेम्ह गीता तिम्सिना व प्रदेशसभा सचिवालय विरुद्ध मुद्दा तःगु खः । रिट निवेदनय् गैरसंवैधानिक रुपय् विश्वासया मत काःगु धासें विश्वासया मत बदर यायेत माग याःगु दु ।

उकथं हे थापां काःगु विश्वासया मत कायम फइगु अवस्था मदु धासें आः संविधानया धारा १६८ (३) कथं थःत मुख्यमन्त्री नियुक्त यायेत नं कार्कीं माग याःगु दु । कार्कीं बिउगु निवेदनय् न्ह्यथनातःगु दु, ‘मुख्यमन्त्रीं विश्वासया मत काये मफइगु व हाकनं निजं उगु अवसर नं कायेगु मिले मजूगुलिं संविधानया धारा १६८ (३) कथं प्रदेशसभाय् दकलय् तःधंगु संसदीय दलया नेताया हैसियतं मुख्यमन्त्री नियुक्त जुइ दइगु जिगु संवैधानिक अधिकार खः ।’

उकथं हे रिट निवेदनय् मुद्दा क्वःमजिउतले सरकारं दिर्घकालीन लिच्वः लाइगु प्रकृतिया ज्या व निर्णय यायेगु सर्वथा अनुचित, गैरसंवैधानिक, गैरसंसदीय व संवैधानिक नैतिकताया अःखः जुइगु जूगुलिं गुगुं नं कथंया ज्या मयाकेत मयायेत अन्तरिम आदेश बीमाःगु माग नं यानातःगु दु ।
अथे हे कार्कीं थ्व स्वयां न्ह्यः साउन ११ गते सर्वोच्च अदालतं बिउगु आदेश मुख्यमन्त्री थापां उल्लंघन याःगु धासें अदालतया अवहेलनाया कारबाही यानाः हदै तक सजाय बीत नं माग यानातःगु दु ।

थ्वहे झ्वलय् मुख्यमन्त्री विरुद्ध लाःगु मुद्दायात कयाः थौं सुनुवाइ जुइगु जूगु दु । सर्वोच्च अदालतया प्रवक्ता विमल पौडेलया कथं उगु रितयात कयाः थौं सुनुवाइ जुइ । रिट एकल न्यायाधीशया इजलासय् पेश जुयाः अल्पकालीन अन्तरिम आदेश वा अन्तरिम आदेशया माग जुइ फइगु सम्भावना दु । सर्वोच्चं अन्तरिम आदेश बिल धाःसा थापा नेतृत्वया सरकार कामचलाउ जुइ ।

थ्वहे झ्वलय् म्हिगः १ नम्बर प्रदेशसभाया बैठक विपक्षी नेकपा एमालें बहिष्कार याःगु दु । सभाध्यक्ष इस्राइल मन्सुरीं बैठक न्ह्याकेवं एमाले व राप्रपाया सांसदतय्सं नाराबाजी यानाः बैठक त्वःता वंगु खः । वयां लिपा सभाध्यक्ष मन्सुरीं अनिश्चितकालया नितिं बैठक स्थगित यानादीगु खः । प्रदेश १ या राजनीतिक मुद्दा निक्वः तक सर्वोच्च वनेधुंकूगु दु ।