ने. सं. ११४४ कौलाथ्व एकादशी - चालं

नेपाः ओमानलिसे बुत, सेमिफाइनलय् युएइलिसे म्हितीगु

येँ (नेपालभाषा टाइम्स)- आईसीसी टी–२० विश्वकप छनोट अन्तर्गत जूगु समुह चरणया अन्तिम कासाय् नेपाः ओमानलिसे पराजित जूगु दु । टियू मैदानय् जूगु कासाय् ओमानं नेपाःयात न्यागू रनं बुकूगु खः । ओमानं बिउगु १४६ रनया लक्ष्य ज्वनाः मैदानय् वःगु नेपाः १४० रनय् दयेकाः अलआउट जूगु खः ।

नेपाः समूहया उपविजेता जुयाः सेमिफाइनलय् थ्यंगु दुसा पुचःया स्वंगुलिं कासा त्याकाः ओमान समुह विजेता जूगु दु । नेपालं आः शुक्रवाः जुइगु सेमिफाइनलय् समूह बीया विजेता युएइलिसे म्हिती । कासा सुथसिया ११ ताः इलय् जुइ । नेपाः सेमिफाइनलय् त्यात धाःसा टि–२० विश्वकपया निंतिं छनोट जुइ ।

कासाय् टस त्याकाः नेपालं न्हापां बलिङ याःगु खः । ओमानं निर्धारित २० ओभरय् ९ विकेटया क्षतिइ १४५ रन दयेकूगु खः । ओमानया कप्तानं जिशान मकसुलं ३२ रन व नसिम खुशीं २५ रन दयेकूगु खः । नेपाःया करण केसीं स्वंगू विकेट काःगु खःसा सन्दीप लामिछाने व सोमपाल कामीं निगू निगू विकेट काःगु खः । अथेहे गुल्शन झा व अविनाश बोहरां छगू छगू विकेट काःगु खः ।

ओमानं बिउगु १४६ रनया लक्ष्य ज्वनाः मैदानय् वःगु नेपाः १४० रन दयेकाः अलआउट जूगु खः । नेपाःया निंतिं विवेक यादवं दकलय् अप्वः ३९ रन दयेकूगु खःसा कुशल भुर्तेलं २६ रन दयेकूगु खः । कासाया अन्तिम ओभरय् नेपाः त्याइगु सम्भावना पिहां वःगु खः । अन्तिम ओभरय् नेपाःयात त्याकेगु निंतिं २६ रन माःगु खः । अन्तिम ओभरया न्हापांगु निगू बलय् विवेकं छक्का प्रहार याःगु खः । वं धुकाः बिलाल खानं वाइड बल बिल ।

विवेकं हाकनं छक्का प्रहार यायेवं नेपाःयात त्यकेगु निंतिं स्वंगू बलय् ७ रन माःगु खः । तर विवेक आउट जुल । ओभरया न्यागूगु बलय् अभिनाश बोहरां छगू रन काल । अन्तिम बलय् नेपाःयात छक्का माःगु खः । करण केसी अन्तिम बलय् छक्का प्रहार यायेत स्वःगु खःसां क्याच आउट जुल अले नेपाः न्यागू रनं बुत ।