अबु व म्ह्याय्या चिनाखँ व नियात्रा सफू पिदन
- नेपालभाषा टाइम्स
- ११४६ तछलागा पारू
- किपा-हर्क बहादुर श्रेष्ठ
यल (नेपालभाषा टाइम्स) – देगः म्हिचा सफूया ग्वसालय् जूगु छगू ज्याझ्वलय् अबु व म्ह्याय्या निगू सफू पिदंगु दु । वंगु तछलाथ्व चतुर्दशि, आइतवाः थनया कोपुण्डोलय् च्वंगु सातोआकी भवनय् जूगु ज्याझ्वलय् कवि नारद वज्राचार्यया चिनाखँ सफू ‘धुँ जंगल पिने दु’ व वय्कःया म्ह्याय्या निभाः वज्राचार्यया नियात्रा सफू ‘देशय् दुने : देशं पिने’ पिथंगु खः ।
ज्याझ्वलय् च्वसापासाया नायःलिसें वरिष्ठ गजल च्वमि भूषणप्रसाद श्रेष्ठं नेपालभाषा साहित्यय् नियात्राया इतिहासयात कुलादिसें पितब्वज्या जूगु निगुलिं सफूया च्वमिपिंत भिंतुना देछानादिल । लिसें वय्कलं निम्हं च्वमिपाखें नेपालभाषाया साहित्यया धुकू जायेकेत निरन्तरता बिया वयाच्वनी धइगु झलसा नं कयादिल ।
नेपालभाषा एकेदेमिया भाइस चान्सलर डा. पुष्पराज राजकर्णिकारं कवि वज्राचार्यया सफूयात कयाःबःचा हाकलं समीक्षा यानादिसें कवि वज्राचार्यं चिनाखँ न्ह्यथनातःम्ह धुँ जंगलया हिंस्रक धुँ मखसे मानवीय संवेदनां जाःम्ह, देशभक्तिं जाःम्ह धुँ खः धयादिल ।
कवि वज्राचार्यं लसकुस यानादिसें थःगु चिनाखँया बारे व नियात्रा साहित्यय् पिलू वःम्ह निभाः वज्राचार्यया नियात्रा लेखनयात कयाः नुगःखँ तयादीगु खः ।
अथे हे नियात्रा च्वमि निभाः वज्राचार्यं थःगु नियात्रा सफू व कवि वज्राचार्यया सफू थःपिं थीथी ज्याया निंतिं थीथी देय् व थासय् चाःहिउ वनाबलय्या यात्रा विवरण जक मखसे उगु थाय्या सुलाच्वंगु बाख., अनुभव, कला, संस्कृति, इतिहास, सभ्यता, जीवन, जीवनशैलीयात नं न्ह्यब्वयागु खँ कनादिल ।
सभापतिया थासं साहित्यकारलिसें ‘शुक्रवाःया तँसापौ’या सम्पादक रमेशकाजी स्थापितं नियात्रा सफूया भूमिका च्वयागु इलय् दक्व च्वसुया समीक्षा यानागु खँ कनादिसें नियात्राय् विवरण जक मखसे जीवन नं दयेमाःगु खँ कनादिल ।
नेवाः हाइकु ख्यःया सुरेश प्रधानं नं भिंतुना न्वचु बियादीगु ज्याझ्वलय् देगः म्हिचापाखें बाखं च्वमि भरत साःमिं पाहांपिंत खादा क्वखायेकाः लसकुस यानादीगु खः ।
ज्याझ्वलय् वरिष्ठ कवि डा. योगेन्द्र प्रधान,डाकेशवमान शाक्य, पुष्प तुलाधर, श्रीराम श्रेष्ठ, रासा, प्रतिसरा साय्मि, रजनी मिला नियात्रा च्वमिपिं बंशीधर वज्राचार्य, राजेन मानन्धर, बिमलप्रभा वज्राचार्य, दिब्या ताम्राकार, नरेशवीर शाक्यया उपस्थिति दुगु खः । ज्याझ्वलय् नियात्रा च्वमि वज्राचार्यं पाहांपिंत मतिनाया चिं देछानादीगु खः ।
LEAVE YOUR COMMENTS