रङ्ग बिज्ञान

चिनाखँ

न्ह्याबले तुइसे खने दइगु च्वापुगुँ
सुद्र्यया निभा लायेवं
सुथय् खनेदइ म्हासुसे
न्हिनय् खनेदइ तुइसे
सनिलय् खनेदइ ह्याउँसे

खनागु प्याजी म्हगस
जुया वनी म्हासुगु विपना
दयेकागु वाउँगु आज्जु
कुतुंवना जुइ भुयूगु निराशा
रङ्ग हिलीगु जिगु जिन्दगीया
न्ह्याबलेंया हाकुगु नियति खः
वा खः ?
जिन्दगीइ जिन्दगीया
रङ्ग नाप म्हिते मसःगु सादा लिच्वः ?

जिन्दगीया तुयुगु भ्वँतय्
सुनां किल न्ह्योने लाला थे हाकुगु ध्वः
गबले कि जिं च्वयागु खः रङ्गीन स्वां
जिन्दगीया वचुगु आकासय्
गथे खने दत हाकुगु सुपाँय्
गबले कि जिं खनागु खः सप्तरङ्गी लाय्लामा

सुयागुं वचुगु मिखालिसे
जिं मिखा ल्वाकल कि जिगु हिसिदुगु मिखां
उल्टां जुया वनी स्वापु हे बेरङ्गी
सुयागुं ह्याउँगु बिचारधाराय्
जिं ल्वाकलकिं कलेजी बिचाः
जुया वनी उल्टां दर्शन बेरङ्गी

ह्याउँगु रंगय् हाकुगु ल्वाकः छ्यातकिं
पिहाँ वयेमाःगु खः म्हासुगु रङ्ग
ह्याउँगु रङ्गय् म्हासुगु ल्वाकः छ्यातकिं
पिहाँ वयेमाःगु खः प्याजी रङ्ग
जिं रङ्ग ल्वाकः छ्यातकिं छाय् पिहाँ वइ मखु ?
सुत्र अनुसारया रङ्ग
थः हे जुया वनी बरु बेरङ्गी

जि बिचाः याना च्वना
म्होतिं न लखय् तयागु रङ्ग थें ला
लःया रङ्ग जुइ माःगु मखुला ?

सयेके माःगु दु जिंन जीवनया रङ्ग विज्ञान
जिन्दगीया रङ्गीन लँपु दयेके माःगु दु लाँय्लामा थें
निभालं यइपुसे खने दयेकुथें च्वापुगुँ
किपालुमि यइपुसे खने दयेकुथें किपा

नवीनप्रकाश श्रेष्ठ

च्वमिया मेमेगु

• लापा – थःगु फाँसीया अनुमोदन