दाहालं केन्द्र–प्रदेश द्वन्द्व तच्वयेकेत्यंगु राजपाया द्वपं
येँ- राष्ट्रिय जनता पार्टी नेपालया उपाध्यक्ष वृषेशचन्द्र लालं नेपाल कम्युनिष्ट पार्टीया अध्यक्ष पुष्पकमल दाहाल ‘प्रचण्डं’ संघ व प्रदेश दथुइ द्वन्द्व अप्वयेकेत स्वःगु द्वपं बियादीगु दु । म्हिगः रिपोर्टर्स क्लबं ग्वसाः ग्वःगु ज्याझ्वलय् न्ववायेगु झ्वलय् वय्कलं उगु द्वपं बियादीगु खः ।
वंगु छुं न्हिं न्ह्यः जक दाहालं २ नम्बर प्रदेशया पार्टीया ज्याकू उलेज्या व तुच्चा ज्याझ्वलय् न्ववायेगु झ्वलय् प्रदेश प्रहरीया ऐन पारित याःगु सम्बन्धय् न्ववायेगु झ्वलय् संघीय सरकारयात ‘ओभरटेक’ मयायेत ख्याच्वः बिउगु खःसा उकियात हे लिसः बीकथं लालं म्हिगः उगु खँ धयादीगु खः ।
जनकपुर वनाः दाहालं बिउगु उगु धापूयात धम्कीया संज्ञा बिसें द्वन्द्व अप्वयेकेगु कथं वय्कलं अज्याःगु अभिव्यक्ति बियादीगु दावी नं लालं यानादीगु दु । वय्कलं धयादी, ‘छम्ह शीर्ष नेतां थुकथं जनकपुरय् वनाः धायेगुया अर्थ द्वन्द्व चर्के जुइमा, स्थिति स्यनेमा, विश्वासया वातावरण मदयेमा, थ्व सरकार बदनाम जुइमा व वयां लिपा प्रधानमन्त्री जुइगु थःगु पाः वइ धइगु दुनेंनिसेंया रणनीति जुइफु ।’
प्रचण्डया अभिव्यक्तियात थःपिंसं गम्भीर रुपं कयागु धासें थ्व सल्लाह व सहलह रुपय् मखुसें धम्की हे जूगु दावी नं वय्कलं यानादिल । वय्कलं संघीय सरकारं प्रदेश सरकारयात विघटन व निलम्बन याये फइ धासें वयां लिपाया अवस्था झन जटिल जुइगु खँ कनादिल । संघीय संरचना मदयेकेत केन्द्रीय सरकारं थज्याःगु ज्या यात धाःसा मधेशी जनतां उकिया प्रतिकार याइगु ख्याच्वः नं वय्कलं बियादिल ।
वय्कलं अन्तर प्रदेश परिषदया बैठक आः तक च्वने मफुनि धासें याकनं हे बैठक सःतेत प्रधानमन्त्री केपी ओलीयात इनाप नं यानादिल ।
अथेहे कांग्रेस नेता भरतबहादुर खड्कां प्रदेश सरकार अधिकार मदयाः पंगु जूगु धासें सरकारं याकनं हे उचित निकास बीमाःगु माग यानादिल । वय्कलं प्रदेशयाके बजेट दुसां अधिकार व संयन्त्र मदयाः कार्यान्वयन जुइ मफयाच्वंगु बिचाः नं तयादिल ।
LEAVE YOUR COMMENTS