धर्मोदय सभापाखें मायादेवी देगलय् पुजारी तयेमाःगु मागया विरोध

येँ (नेपालभाषा टाइम्स)( धर्मोदय सभां लुम्बिनीया मायादेवी देगलय् पुजारी तयाः पुज्याये माःगु माग तसकं गलत जूगु खँ धाःगु दु । सभां छगू विज्ञप्ति पिथँसें लुम्बिनीया मायादेवी देगः धयागु पुजा पाठ यायेगु थाय् मखु, छगू अमूल्य सम्पदा खःसां थज्याःथाय् पुजारी तयाः द्यः पुज्यायेमाल धकाः तःगु माग तसकं गलत जूगु खँ धाःगु दु ।

लुम्बिनीया स्थानीय वासिन्दातय् नामं झिंगुंगू माग तयाः लुम्बिनी विकास कोषयात बिउगु ज्ञापनपत्र मायादेवी देगलय् पुजारी तयाः पुज्यायेमाःगु खँ न्ह्यथनातःगु खः । सभां थ्व ज्ञापनपत्र किसिया क्यनेगु वा थें जूगु धासें थज्याःगु मागय् छुं कथं कारवाही याये आवश्यक मजूगु खँ नं धाःगु दु ।

सभाया ब्वनाय् वंगु साउन २३ गते थीथी बौद्ध संघसंस्थातय् दथुइ च्वंगु विशेष बैठक लिपा सभां पिकाःगु विज्ञप्तिइ भगवान बुद्धया पवित्र जन्मस्थल लुम्बिनीइ छुं न्हि न्ह्यवनिसें विकसित जूगु अशान्तिया वातावरणय् सभाया ध्यानकर्षण जूगु खँ धयातःगु दु ।

लुम्बिनी थेंज्याःगु पवित्र स्थलय् मैत्री व शान्तिया वातावरण स्यनी कथं तालाबन्दी, घेराउ याःगु ज्या तसकं अशोभनिय जूगु खँ न्ह्यथँसें विज्ञप्तिइ कोषय् न्ह्यब्वःगु छुं छुं माग सकारात्मक जूसां थुपिं माग देखावटी जक जूगु खँ धाःगु खः । लुम्बिनी विकास कोष स्थानीययात जिम्मा बीमाःगु जायज मजूगु खँ नं विज्ञप्तिइ न्ह्यथनातःगु दु ।