सरकारं थःगु भूमि तकं दावी यायेमफु

येँ (नेपालभाषा टाइम्स) – नेपाली कांग्रेसया नेता प्रकाशमान सिंहं सरकारं थःगु भूमि तकं दावी यायेमफुगु द्वपं बियादीगु दु। म्हिगः शनिवाः स्यूचाटारय् दयेकूगु पार्कया उलेज्या यासें वय्कलं थ्व खँ धयादीगु खः ।

वय्कलं हुम्लाय् नेपाली भूमि अतिक्रमण याःगु दु कि मदु धकाः स्वःवंपिं सरकारी पुचः हे लिहां मवःनिगु इलय् परराष्ट्रमन्त्री प्रदीप ज्ञवालीं हथासं चीनं नेपाली भूमि अतिक्रमण याःगु मदु धकाः न्ववाःगु खँ धयादीगु खः । वय्कलं सरकारं थःगु भूभाग हे संरक्षण यायेमफुगु दुर्भाग्य जूगु खँ धयादिसें सरकारया परराष्ट्र नीति असन्तुलित दुगु द्वपं नं बियादीगु दु। अथेहे वय्कलं देशय् ततःधंगु भ्रष्टाचार जुयाच्वंगु व भ्रष्टाचारय् संलग्नपिंत सरकारं हे उन्मुक्ति बियाच्वंगु दु धासें भ्रष्टाचारया निष्पक्ष छानविन यायेमाःगु माग नं यानादीगु दु ।