कैलालीया संक्रमितयात अस्पतालं डिस्चार्ज

येँ – धनगढीया सेती अस्पतलाय् वासः याकाच्वंम्ह कोरोना भाइरस (कोभिड-१९)या संक्रमितया रिपोर्ट नेगेटिभ वयेवं अस्पतालं डिस्चार्ज याःगु दु ।

कैलाली लम्कीचुहा नगरपालिका-९या २१दँया ल्याम्हयात आइतवाः अस्पतालं डिस्चार्ज याःगु खः । चैत २२ गते सेती अस्पताल भर्ना जुम्ह उम्ह ल्याम्हया निगूगु व स्वंगूगु रिपोर्ट नं नेगेटिभ वःगुलिं अस्पतालं डिस्चार्ज याःगु खः । डिस्चार्ज यायेगु झ्वलय् सुदूरपश्चिमया सामाजिक विकास मन्त्री लगायतं बिदाई याःगु खः ।

भारतया मुम्बइ नं चैत ११ गते छेँ लिहांवःम्ह उम्ह मनू झिंखुन्हु तक अस्पतालय् वासः याकेत च्वंगु खः । कैलालीया प्रतापपुरया क्वारेन्टाइनय् झिंछन्हु च्वनेधुंकाः उम्ह मनूयात कोरोना भाइरसया संक्रमण जूगु पुष्टि जूगु खः ।

नेपालय् आः तक ३१म्ह कोरोना भाइरस संक्रमित मध्ये प्यम्ह स्वास्थ्यलाभ जुयाः छेँय् वनेधुंकूगु दु ।