प्रदेशसभा खारेज यायेगु अवधारणाया विरोध
येँ (नेपालभाषा टाइम्स) – नेपाल कम्युनिष्ट पार्टी आवद्ध नेवाः संगठनतय्सं राष्ट्रिय स्वतन्त्र पार्टी (रास्वपां) थःगु न्हापांगु महाधिवेशनय् न्ह्यब्वःगु प्रदेशसभा खारेज सम्बन्धी अवधारणाया विरोध याःगु दु ।
नेवाः राष्ट्रिय मुक्ति मोर्चा, नेपाल नेवाः राष्ट्रिय संघ (समाजवादी) व जनता समाजवादी नेवाः संघ लगायत नेवाः संगठनत दथुइ सांगठनात्मक एकता यानाः एकीकृत नेवाः संगठन निर्माण यायेगु उद्देश्यं नीस्वंगु एकता भेला संयोजन समन्वय समितिया मुँज्यां उगु विरोध याःगु खः ।
स्वंगुलि संगठनया नायःपिं उमेश स्थापित, माईलाबाबु द्यःला व ज्ञानेन्द्र वज्राचार्यं मंकाः कथं पिथनादीगु विज्ञप्तिइ प्रदेश सभा संघीय व्यवस्थाया मू संस्थागत आधार जूगु खँ न्ह्यथंगु दु । विज्ञप्तिइ धयातःगु दु, ‘थ्व केवल प्रदेशया व्यवस्थापिका जक मखसें नीति निर्माण, कानून निर्माण, प्रदेश सरकारया उत्तरदायित्व सुनिश्चित यायेगु व प्रदेश दुनेया नागरिकतय् लोकतान्त्रिक प्रतिनिधित्वया संवैधानिक माध्यम नं खः ।’
अथेहे समन्वय समितिं प्रदेशसभा खारेज वा प्रदेशयात केवल प्रशासनिक इकाइलय् जक सीमित यायेगु गुगु नं कथंया अवधारणां संघीय लोकतान्त्रिक गणतन्त्रया मर्म, संविधानं सुनिश्चित याःगु शक्ति बाँडफाँड व पहिचानया लिधंसाय् संघीय पुनःसंरचनाया उद्देश्यात कमजोर याइगु खँ धाःगु दु । नापं राजनीति दलतय्त संघीय लोकतान्त्रिक गणतन्त्रया संवैधानिक संरचना, प्रदेशसभाया संस्थागत भूमिका व पहिचानया अधिकारप्रति दृढ जुइत नं इनाप याःगु दु ।
उकथं हे वि.सं. २०७६ साल पुस २७ गते प्रदेशया पहिचानविहीन नामांकरण याःगु न्हियात लुमंकाः हरेक दँय् उगु न्हियात ‘हाकूगु न्हि’ कथं हनेगु खँ नं धाःगु दु । उगु न्हि कुन्हु पहिचान, संघीयता, भाषिक अधिकार, सांस्कृतिक अधिकार व संविधानप्रदत्त समावेशी व्यवस्थाया पक्षय् जनजागरण मूलक ज्याझ्व यायेगु कथं ज्याझ्वः नं समन्वय समितिं क्वःछिउगु दु ।
LEAVE YOUR COMMENTS