सार्वजनिक रुपं दलाइ लामाया बुन्हि हन
सिडिओ व प्रहरीं अनुमति मबियागु दावी, थीथी देय्या राजदूतत नं ज्याझ्वलय् सहभागी
येँ (नेपालभाषा टाइम्स) – चीनया निर्वासित धर्मगुरु दलाइ लामाया बुन्हि येँ सार्वजनिक रुपं न्यायेकूगु दु । नेपाः चीनया ‘एक चीन नीति’यात समर्थन याना वयाच्वंगु देय् जूगुलिं थन दलाइ लामा सम्बन्धी छुं नं गतिविधि यायेत निषेध यानातःगु दु । अथेखःसां न्हूगु सरकार वयेधुंकाः थुगुसी थुकथं खुल्ला रुपं हे दलाइ लामाया बुन्हि हंगु खः । अले थुगु ज्याझ्वलय् नेपाःस्थित थीथी देय्या राजदूततय्सं नं ब्वति काःगु खः ।
नागार्जुन नगरपालिका २ वडा, ठुलो भर्याङय् च्वंगु नामग्याल आवासीय निम्न माध्यमिक विद्यालयय् दलाइ लामाया ९१ क्वःगु बुन्हि हनेगु ज्याझ्वः जूगु खः ।
आनी गुम्बा स्वयम्भूया प्रमुख गुरु खेन्पो छ्यान्पा मू पाहाँ कथं थ्यंगु ज्याझ्वलय् नेपाःया निंतिं अमेरिकाया कार्यवाहक राजदूत स्कट अर्बोम, फ्रान्सेली राजदूत भर्जिनी कर्टबेल, अस्ट्रेलियन राजदूत साइमन अन्स्र्ट, युरोपियन युनियनया प्रतिनिधिमण्डलया प्रमुख भेरोनिक लोरेन्जो थ्यंगु खँ धाःगु दु । थुकिया लिसें थीथी गुम्बाय् च्वनाच्वंपिं तिब्बतियन प्रतिनिधि, शिक्षक व विद्यार्थीतय् उपस्थिति दुगु खः ।
नेपालय् दलाइ लामा सम्बन्धी छुं नं ज्याझ्वः याये मदु । अथे खःसां सुलाः सुलाः थीथी गुम्बाय् ज्याझ्वःत जुया वयाच्वंगु दु । चीनं थुकियात कयाः न्हापां निसें हे नेपाःया ध्यानकर्षण याना वयाच्वंगु खः । थुगुसी धाःसा थ्यंमथ्यं सार्वजनिक रुपं हे धयाथें बुन्हि हनेगु ज्याझ्वः जूगु खः । जेनजी आन्दोलन लिपा फ्रि तिब्बेत पुचःलिसे स्वापू दुम्ह धकाः चर्चाय् दुम्ह सुधन गुरुङ गृहमन्त्री जुयाच्वंगु इलय् थज्याःगु खुल्लेआम ज्याझ्वः जूगुलिं शंकाया दृष्टिं स्वयाहःगु दु ।
येँया सिडिओ कार्यालयं धाःसा थःपिंसं थज्याःगु ज्याझ्वःया निंतिं अनुमति मबियागु खँ धाःगु दु जिल्ला प्रशासन कार्यालय येँया सूचना अधिकारी सुजन बर्देवां दलाइ लामाया बुन्हि हनेगु निंतिं सुनां नं अनुमति काः नं मवःगु अले थःपिंसं नं मबियागु खँ धाःगु दु । अथेहे काठमाडौं उपत्यका प्रहरी परिसरया प्रवक्ता एसपी पवनकुमार भट्टराईं नं दलाइ लामासम्बन्धी सार्वजनिक गतिविधि यायेमदुगु खँ धयादिसें बुन्हि हना च्वन धयागु खबर वःगुलिं थःपिं स्वः वनागु तर प्रहरी अन थ्यंबलय् अज्याःगु छुं नं गतिविधि जुयाच्वगु मलूगु खँ धयादीगु दु ।
वय्कलं थःथःगु धार्मिक आस्था कथं कार्यक्रम याःदुसां दलाइ लामाया हे बुन्हि हनेगु निंतिं छुं नं कथंया स्वीकृति मबियागु धयादीगु दु ।
LEAVE YOUR COMMENTS