लिहां वल अमेरिकां निगू मूर्ति

येँ (नेपालभाषा टाइम्स) – अमेरिकाय् थ्यंगु निगू मूर्ति म्हिगः नेपाः लित हःगु दु । लितहःगु सम्पदा १३ औं शताब्दीया पद्मपाणी मूर्ति व १६ औं शताब्दीया नृत्यदेवीया मूर्ति खः । अमूल्य सांस्कृतिक सम्पदा लिहां वयेवं सांस्कृतिक सम्पदाया अवैध ओसारपसार नियन्त्रण लिसे धार्मिक एवं ऐतिहासिक वस्तुयात मौलिक समुदायय् पुस्थापना यायेगु खँय् नेपाः व अमेरिका दथुइ दीर्घकालीन सहकार्य सुदृढ जूगु खँ अमेरिकी दूतावासं धाःगु दु ।

उकथं हे नकतिनि लागू जूगु अमेरिका-नेपाः सांस्कृतिक सम्पदा सम्झौता थुगु ज्यायात अझ प्रभावकारी दयेकीगु खँ नं दूतावासं जारी याःगु विज्ञप्तिइ धयातःगु दु । सम्झौताय् अनुसन्धानय् सहकार्य, अवैध तस्करी पनेगु व नेपाःया समृद्धि सांस्कृतिक सम्पदाया संरक्षणया निंतिं निगुलिइ देशं मंकाः कुतः यायेगु खँ धाःगु दु ।

अमेरिकी दूतावासया जनसम्पर्क प्रमुख माइक हार्करं आः तक अमेरिकां नेपाःयात १२७ गू पुरातात्विक सम्पदा लित बीधुनागु जानकारी नं बिउगु दु । वय्‌कलं थ्व निगू पवित्र मूर्ति पुनस्थापनां आपराधिक अनुसन्धान, कुटनीतिक समन्वय व समुदायया सक्रियतां पुरातात्विक सम्पदा अवैध तस्करी नियन्त्रण यायेफइगु उदाहरण जूगु खँ धयादीगु दु । लित वःगु मूर्ति हस्तान्तरण ज्याझ्वलय् येँ महानगरपालिकाया कार्यवाहक मेयर सुनिता डंगोल व यल मनपाया मेयर चिरिबाबु महर्जनपिसं ब्वति कयादीगु खः ।