ने. सं. ११४४ कौलाथ्व पारू - नःलास्वनेगु

पोशाक दिवसय् नेवाः वसः व थीथी झाँकी ब्वज्या

येँ- येँ महानगरपालिका वडा नं. १४ रवि भवनय् च्वंगु निसर्ग बाटिका स्कुलय् राष्ट्रिय पोशाक दिवस कुन्हु नेवाः वसःया ब्वज्या याःगु दु । वंगु पुस १६ गतेकुन्हु पोशाक दिवसया लसताय् लाकाः तगिं च्यागूया ब्वँमिपिंसं उकथं नेवाः वसःया ब्वज्या याःगु खः ।

ब्वनेकुथिया इसीए कोअर्डिनेटर राजु महर्जनं बियादीगु जानकारीकथं थीथी चरणय् न्ह्याःगु ज्याझ्वलय् ब्वनेकुथिया च्यागू तगिंया ब्वँमिपिंसं नेवाः वसः पुनाः ¥याम्प वाकलिसें यँयाःया इलय् पिहां वइगु लाखे व पुलुकिसि बारे जानकारी सहितया प्रस्तुति बिउगु खः ।

न्हापांगु चरणय् छेँज्यालिसे स्वापू दुगु थीथी हलंज्वलंया जानकारी बीगु नापं उकिया प्रयोगया बारे प्रस्तुति बिउगु खः । लिसें उगु इलय् नेवाः समाजय् मिसातय्त याइगु थीथी संस्कार इहि, बाः¥हाः व इहिपाया बारे नं जानकारी व प्रस्तुति बिउगु खः ।

अथे हे निगूगु चरणय् स्वनिगः दुनेया किसानतय्सं बुँज्या याइगु इलय् छ्यलीगु थीथी हलंज्वलंया बारे जानकारी बिउगु खःसा दकलय् लिपा स्वंगूगु चरणय् थीथीकथंया परम्परागत नेवाः बाजंया बारे नं प्रस्तुति बिउगु खः ।

ज्याझ्वःया दकलय् लिपांगु ब्वय् पुलुकिसि व लाखेप्याखं न्ह्यब्वःगु खः । ज्याझ्वलय् येँ महानगरपालिका शिक्षा विभागया प्रतिनिधिकथं अनिल स्थापित व दीपक तुलाधरया उपस्थिति दुगु खः ।
लुमंकेबहजू येँ महानगरपालिकां थःगु लागा दुनेया सामुदायिक व संस्थागत ब्वनेकुथिइ अनिवार्य रुपं स्थानीय पाठ््यक्रम ‘येँ देय् म्हसीके’ ब्वंकेमाःगु व्यवस्था यायेवं आपालं ब्वनेकुथिइ नेवाः गतिविधित न्ह्याना वयाच्वंगु दु ।