जैशिदेवल युथ क्लबया २५ क्वःगु बुन्हि हना ज्याझ्वः
सामाजिक सेवा निरन्तररुपं न्ह्यानाच्वंगु जैशिदेवल युथ क्लबं थःगु २५ दँ बुन्हि भदौ ९ गते शनिवाः थनया जैशिदेगलय् विशेष ज्याझ्वः यासें हन ।
पुलांम्ह उपप्रधानमन्त्री प्रकाशमान सिंह मूपाहां कथं झायादीगु उगु ज्याझ्वलय् मूपाहां सिंहं क्लबया नवनिर्मित भवनया रिवन चानाः उलेज्या यानादीगु खःसा क्लबया स्मारिका सफू नं उलेज्या यानादीगु खः । अथे हे उगु ज्याझ्वलय् येँ महानगरपालिकाया मेयर विद्यासुन्दर शाक्य, उप मेयर हरिप्रभा खड्गी श्रेष्ठ, पूर्व सांसद्पिं रविन्द्रलाल श्रेष्ठ, कृष्ण अमात्य, पूर्व प्रहरी महानिरिक्षक प्रकाश अर्याल, पूर्व ससस्त्र प्रहरी महानिरिक्षक सिंहबहादुर श्रेष्ठ, पूर्व एआइजि बिजय कायस्थ, नेपाल अभिवाहक संघया अध्यक्ष नापं नेपाल तेक्वानदो संघ प्रदेश नं ३या अध्यक्ष केशव पुरी व नेपाल भारत मैत्री समाजया प्रेम लस्कर व येँमपा २१ वडाया वडाध्यक्ष उदय चुडामणि वज्राचार्यपिं पाहां कथं झायादीगु खः ।
क्लबं थःगु स्थापना कालंनिसें थौं तक निःशुल्क स्वास्थ्य शिविर संचालन, सरसफाई कार्यक्रम, नव प्रतिभाया कदर स्वरुप नृत्य प्रतियोगिता, चित्रकला प्रतियोगिता, थीथी खेलकूद प्रतियोगिता आदि सम्पन्न याये धुंकुगु दुसा झीगु परम्परा, संस्कृति व सम्पदायात म्वाका तयेगु नितिं एकचित्त बियाः थुगु क्लबपाखें धार्मिक जात्रापात्रा जुइगु इलय् नं थःपिनिगु शिविर तयाः ग्वाहालि यानावयाच्वंगु खःसा वंगु ७२ सालया तःभुखाचं क्षतिग्रस्त जूगु जैशिदेगःया द्यःगःया जिर्णोद्धार ज्याय् नं दत्तचित्त बिया ज्या यानावयाच्वंगु दु ।
क्लबया अध्यक्ष राजेश प्रजापतिया सभापतित्वय् न्ह्याःगु थुगु ज्याझ्वलय् क्लबयात थीथी इलय् थीथी कथं ग्वाहालि याना वयाच्वंपिं व्यक्ति नापं संघसंस्थाया हनापौ व खादा क्वखायेकाः हनेगु ज्या नं जूगु खः । क्लबया सचिव चन्द्रगोपाल प्रधानं लसकुस यानादीगु खःसा ज्याझ्वः राजेन्द्र मानन्धरं न्ह्याकादीगु खः । ज्याझ्वलय् सांस्कृतिक ज्याझ्वः नापं नेवाः परम्परा कथं तःजिक नेवाः भ्वय् नं जूगु खः ।
LEAVE YOUR COMMENTS