मेयर सरुवा याइम्ह सांसद : सांसद गेलालया भिडियो सार्वजनिक याःम्ह रास्वपाया हे मेम्ह सांसद
येँ (नेपालभाषा टाइम्स) – स्थानीय तहया जनप्रतिनिधित छगू पालिकां मेगु पालिकाय् सुरुवा जुइफइ ला ? नेपाःया संविधान, कानुन, स्थानीय तह संचालन ऐनं कथं थ्व सम्भव मदु । निर्वाचित जनप्रतिनिधि गनं नं सुरुवा जुइमखु । तर सत्तारुढ राष्ट्रिय स्वतन्त्र पार्टीया छम्ह सांसद धाःसा निर्वाचित मेयर हे सरुवा यायेगु धकाः हाला जूगु दु ।
रास्वपाया सांसद पारसमणि गेलालं धाःसा मेयर हे सरुवा यायेगु धयाच्वंगु दु । वय्कलं फोनं खँ ल्हायेगु झ्वलय् थथे धयाच्वंगु भिडियो थौंकन्हय् सामाजिक सञ्जालय् भाइरल जुयाच्वंगु दु ।
संविधानया धारा २१५ व स्थानीय तह संचालन ऐन २०७४ कथं गाउँपालिका वा नगरपालिकाया निर्वाचित जनप्रतिनिधियात चीकेत कि मखुसा महाअभियोग हे तयेमाः, मखुसा अदालतं हे फैसला यानाः चीकेमाः, कर्मचारीतय्त थें छथासं मेथाय् सरुवा यायेगु प्रावधान मदु । सत्तारुढ रास्वपाया सांसद गेलालं टेलिफोनय् धयाच्वंगु दु, ‘अधिकृत धयापिं कर्मचारी जक खः, उपिं सुध्रे जुइफु । आः मेयरया हे सरुवा यायेमाः । मेयर सरुवा यायेगु तयारी यानादिसँ, जिं धयाच्वनागु दु ।…. छिगु खँ जिं थुल, आः जि अन वयेगु इलय्…. ।’
जेनजी आन्दोलन लिपा जूगु निर्वाचनं थ्यंमथ्यं दुइ तिहाइया ल्याखय् रास्वपाया सांसदत निर्वाचित जुयावःगु दु । तर आः निर्वाचित जुयावःपिं सांसदत व मन्त्री जुयाच्वंपिनिगु थज्याःगु हे म्वाःमदुगु धापू पिहां वयाच्वंगुलिं रास्वपा तसकं आलोचित जुयाच्वंगु दु । गुलिखे सांसदत संसदय् न तकं वाये मसयाः आलोचित जुयाच्वंगु दु । आः मेयर सरुवा याये धाःम्ह सांसद नं ब्वना हे मतःम्ह धाःसा मखु, वय्कः डिग्री कयातये धुंकूम्ह सांसद खः । थज्याःम्ह सांसदं हे मेयर, वडाध्यक्ष, वडा सदस्य थेंज्याःपिं जनप्रतिनिधितय् सरुवा जुइ मखु धयागु मसिउगु खइमखु । वय्कःया थ्व धापू अप्रत्यासित रुपं त्यानावःगुया दम्भ जक जूगु धासें सामाजिक सञ्जालय् यक्वसिनं कुंखिना हयाच्वंगु दु ।
उदयपुर निर्वाचन क्षेत्र १ पाखे त्यानावःम्ह सांसद गेलाल रास्वपा दुने शिक्षा, व्यवसाय व संगठनय् सक्रियम्ह कथं म्हसीका दुम्ह खः । आः पिहां वःगु भिडियों धाःसा वय्कःया छविइ हे गम्भीर न्ह्यसः ब्वलंकाबिउगु दु । वय्कःया थ्व भिडियो रास्वपाया हे मेम्ह सांसदं सार्वजनिक यानाबिउगु खँ धाःगु दु ।
थ्व भिडियो सार्वजनिक जूगु खं रास्वपा दुने नं थौंकन्हय् गुटबन्दी व आन्तरिक कलह तच्वया वःगु संकेत कथं काःगु दु । थ्व भिडियो उदयरपुर २ या सांसद सूर्य तामाङं दकलय् न्हापां सामाजिक सञ्जालय् तःगु खँ धाःगु दु ।
तामाङ रास्वपा सभापति रवि लामिछाने पक्षयाम्ह खःसा गेलाल प्रधानमन्त्री बालेन साह पक्षयाम्ह खः । थ्व भिडियो सार्वजनिक जूगु घटनां रास्वपा दुने लामिछान व साह पक्षय् गुटबन्दी तच्वया वःगु संकेत खनेदुगु रास्वपाया हे दुजःपिंसं धयाहःगु दु । गेलालया थ्व धापूयात कयाः म्हिगः बहनी तक रास्वपा छुं नं प्रतिक्रिया बिउगु मदुनि ।
थ्व स्वयां न्ह्यः रास्वपाया सांसद आशिका तामाङ पार्टीया चुनाव निर्वाचन आयोगं याइ कथं अभिव्यक्ति बिउगु खः ।
LEAVE YOUR COMMENTS