सीम्ह मबिउगुलिं छेँजःपिं आक्रोशित

येँ (नेपालभाषा टाइम्स)- यती एयरलाइन्सया विमान दुर्घटनाय् सीपिनिगु सीम्ह बीत लिबाकूगु धासें सीपिनि छेँजःपिं आक्रोशित जूगु दु । सीम्ह म्हसिकेगु ज्या जूगु नीप्यघौ जायेधुंकाः नं थःपिंत सीम्ह मबिउगु धासें छेँजःपिंसं आक्रोश प्वंकूगु खः ।

सीपिनि छेँजःपिसं सिम्ह बीत लिबागु कारण फ्वँसें गबलय् तक सीम्ह थःपिंत बीगु खः धकाः न्ह्यसः तःगु खः । अस्पतालं फुक्कं पोस्टमार्टम यायेगु ज्या क्वचायेधुंकूपिनिगु सीम्ह तकं मबिउगु खँ धाःगु दु । अस्पतालं धाःसा फुक्कं सीपिनिगु सीम्ह हयेधुंकाः जक सीम्ह बीगु खँ धाःगु दु ।

दुर्घटना जूगु विमानय् च्वनावंपिं ७२ म्ह मध्ये ६९ म्हेसिया सीम्ह लुइधुंकूगु दु । विमानय् च्वनावःपिं स्वम्हेसिया सीम्ह धाःसा आः तक नं बेपत्ता जुयाच्वंगु दु ।

थ्वहे झ्वलय् दुर्घटनाय् लानाः सीपिं मध्ये म्हसिके मफुगु सीम्ह येँय् हइगु जूगु दु । सीम्ह कायेगु नितिं म्हिगः हे हेलिकप्टर वंगु खःसां म्हिगः येँय् छ्वया हयेत मलायेवं थौं जक छ्वयाहयेत्यंगु खः । म्हसिकेधुंकूगु सीम्ह पोखराय् पोस्टमार्टम यायेधुंकूगु दुसा अनं हे थःथितिपिंत जिम्मा बीगु खँ अस्पतालं धाःगु दु । अस्पतालया कथं येँया त्रिवि शिक्षण अस्पतालया फरेन्सिक विभागया चिकित्सकया नेतृत्वय् पोखरा स्वास्थ्य विज्ञान प्रतिष्ठान व मेगु शिक्षण संस्थाया फरेन्सिक विज्ञ चिकित्सकपिंसं सीम्ह छुटे यायेगु ज्या म्हिगः क्वचायेकूगु खः ।

दुर्घटनाय् लूगु सीम्ह मध्ये २६ म्हेसिया जक सनाखत जूगु दु । परिचय पत्रया आधारय् म्हसीकूसां थप सनाखत यायेमाःगुलिं डीएनए परीक्षण नं जुइगु धाःगु दु ।