तिथि विवादयात कयाः सहलह
थिमि (नेपालभाषा टाइम्स)÷राष्ट्रिय विभूति शंखधर साख्वाः प्रतिष्ठानया ग्वसालय् वंगु शनिवाः नेवाः तजिलजि व राष्ट्रिय पञ्चाङ्गया तिथिमितियात कयाः सहलह ज्याझ्वः जुल । वंगु छुं दशक न्ह्यवनिसें नेवाः तजिलजि हनेगुलिइ हने दयाच्वंगु तिथि विवादलिसें उकिं यानाः नखः हनेगुलिइ हने दयाच्वंगु समस्या समाधान यायेकथं सरोकारवाला निकाय दथुइ उगु सहलह ज्याझ्वः जूगु खः ।
प्रतिष्ठानया ग्वसालय् जूगु सहलहय् सरोकारवाला निकाय राष्ट्रिय पञ्चाङ्ग विकास समिति, नेवाः देय् दबू, ज्योतिष, विद्वत वर्गलिसें पर्व सुधार राष्ट्रिय कार्यान्वयन समिति, नेपाल ज्योतिष परिषद्, नेपाल परम्परागत बौद्ध धर्म संघ, वज्रयान महासंघ, यलया हिरण्यवर्ण महाविहार, वाल्मिकी विद्यापीठ, प्रष्तिठानया पदाधिकारी येँ, यल, ख्वपया सरोकारवाला निकायया प्रतिनिधितय् व संचारकःमिपिनिगु सहभागिता दुगु खः ।
वंगु छगू दशक स्वयां न्ह्यवनिसें तिथिमितिया विवादया कारणं सांस्कृतिक विचनल वयाच्वंगु धासें उकिया न्यूनीकरण व समस्या समाधान यायेगु ल्याखं प्रतिष्ठानं सरोकारवाला निकायया प्रतिनिधि व विद्वत वर्गया दथुइ थुकथंया सहलह ज्याझ्वः याना वयाच्वंगु दु ।
प्रतिष्ठानया निवर्तमान नायः श्यामकृष्ण मानन्धरया सभापतित्वय् जूगु ज्याझ्वलय् आः खने दयाच्वंगु सांस्कृतिक विचलनपाखें मुक्त जुयाः नखःचखः हनेगुलिइ एकरुपता कायम जुइमाःगु खँय् सहभागितय्सं बः बिउगु दु । छुं दँ न्ह्यः मोहिन, स्वन्ति, न्हूदँ हनेगुलिइ जक तिथिमितिया विवाद खने दयाच्वंगुलिइ आः वयाः गुंपुन्हि व सापारु हनेगुलिइ नं उकथंया विवाद खने दया वयाच्वंगु दु । थाय् विशेषकथं थःत पाय्छि जूगु इलय् नखः हनेगु ज्यां समुदाय दुने हे बांमलाःगु सन्देश वनाच्वंगु धासें उकिया न्यूनीकरण व समस्या समाधानया लँपु मालेगु ल्याखं उगु ज्याझ्वः जूगु प्रतिष्ठानं जानकारी बिउगु दु ।
ज्याझ्वलय् राष्ट्रिय पञ्चाङ्ग निर्णायक विकास समितिया दुजः प्रा. डा. देवमणि भट्टराई, नेपाल, परम्परागत बौद्ध धर्म संघ येँया नायः राजगुरुजु मञ्जुश्रीरत्न वज्राचार्य, वज्रयान महासंघया अध्यक्ष राजेन्द्रमान वज्राचार्य, नेवाः देय् दबू स्वनिगः विशेष प्रदेशया नायः श्रीकृष्ण महर्जन, पर्व सुधार राष्ट्रिय कार्यान्वयन समितिया हरिनारायण मल्ल, नेपाल पञ्चाङ्ग पत्र तथा हिरण्यवर्ण महाबिहाल, क्वाःबहाःया केशरगोविन्द जोशी, ज्योतिष परिषद्या सल्लाहकार हितराज श्रेष्ठ, वाल्मिकी विद्यापीठया उपप्राध्यापक शान्तरत्न वज्राचार्य लगायतं दक्वं समुदायं छन्हुं हे नखःचखः हनेमाःगु, सांस्कृतिक एकतायात क्वातुकाः यंकेमाःगु व सम्बन्धित पक्षं एकरुपता हयेगुकथंया पात्रो प्रकाशन यायेमाःगु खँय् बः बियादीगु खः ।
लिसें पञ्चाङ्ग विकास समितिइ नेवाःतय् प्रतिनिधित्व मदुगुलिं नेवाःतय्सं हना वयाच्वंगु नखःचखतय् समस्या वयाच्वंगु धासें कार्यविधि व नियमावली संशोधन यानाः नेवाःतय् सहभागिता दयेकेमाःगु व येँ, यल व ख्वपया सम्बन्धित पक्षलिसे समन्वय यानाः सुझाव संकलन यानाः समितिइ छ्वयेगु निर्णय याःगु दु ।
LEAVE YOUR COMMENTS