राष्ट्रिय निवृत्त कर्मचारी संघया गुक्वःगु साधारणसभा

ये – नेपाल राष्ट्रिय निवृत्त कर्मचारी संघया गुक्वःगु वार्षिक साधारणसभा संघया अध्यक्ष गेहेन्द्रमान अमात्यया सभापतित्वय् जुल । साधारणसभाय् पुलांम्ह प्रधानन्यायाधिश सुशीला कार्की मूपाहांकथं झायादीगु खः । मूपाहां कार्कीं त्वाःदेवाय् मत च्याकाः ज्याझ्वःया उलेज्या यासें संघपाखें पिथंगु ‘निवृत्त’ नांया प्यंगूगु संस्करणया नं पितब्वज्या यानादीगु खः ।

ज्याझ्वलय् ७५ दँ पुलेधुंकूपिं निवृत्त कर्मचारीतय्त संघपाखें हनापौ लःल्हाःगु खःसा आर्थिक ग्वाहालि यानादीपिंत सुभाय् पौ व आजीवन दुजःपिंत दसिपौ नं लःल्हाःगु खः । ज्याझ्वलय् विशेषपाहां भद्राकुमारी घले, मूपाहां कार्की, ज्याझ्वःया सभापति अमात्य लगायत थीथी व्यक्तिपिंसं नं थःथःगु नुगःखँ प्वंकादीगु खः ।ज्याझ्वःया दकलय् लिपांगु ब्वय् मूपाहां कार्कीयात सभापति अमात्यं मतिनाया चिंकथं भगवान बुद्धया मूर्ति लःल्हानादीगु खः ।