वसुवर्ण साकोसया तालिम क्वचाल

यल – वसुवर्ण बचत तथा ऋण सकारी संस्था, नागबहाःया ग्वसालय् जूगु उद्घोषण व व्यक्तित्व विकास तालिम क्वचाःगु दु । संस्थाया ग्वसालय् झिन्हुयंकं जूगु तालिम वंगु जेठ ३० गतेनिसें न्ह्याःगु खः ।संस्थाया अध्यक्ष सुमन शाक्यया सभापतित्वय् जूगु तालिम समापन ज्याझ्वःया मूपाहां यल महानगरपालिका वडा नं. १६या वडाअध्यक्ष निर्मलरत्न शाक्यं प्रशिक्षार्थीपितं दसिपौ लःल्हानादिल ।

ज्याझ्वलय् नवासें मूपाहां शाक्यं कला, न्वचु प्रशिक्षण ज्याझ्वः बांलाःगु नापं ज्याझ्वःया व्यवस्थापन पक्षंपाखें थः प्रभावित जूगु धासें वडा व वडावासीपिनिगु विकासया निंतिं वडापाखें जुयाच्वंगु थीथी ज्याया जानकारी बियादिल ।

ज्याझ्वलय् विशेष पाहाकथं नागबहाल टोल सुधार समितिया उपाध्यक्ष, दाफा भजन खलः अध्यक्ष आजु जुजुरत्न शाक्य, वसुवर्ण साकोसया पुलांम्ह नायः बुद्धरत्न शाक्य, तालिमया प्रशिक्षक सुरजवीर वज्राचार्य, नगर सभा सदस्य पञ्चवज्र वज्राचार्यया उपस्थिति दुगु खः ।

मुक्कं नीनिम्हेसिनं प्रशिक्षण काःगु तालिमया प्रशिक्षक वज्राचार्यं न्वचु व ज्याझ्वः न्ह्याकेगु नापं ज्याझ्वः गुकथं ताःलाक हना यंकेगु धइगु बारे नुगःखँ तयादीगु खः । प्रशिक्षार्थीपाखें विणा शाक्य, दीक्षालक्ष्मी शाक्य, सम्राट शाक्य व संस्कृति शाक्यं तालिमया अनुभव कनादीगु खः ज्याझ्वलय् प्रशिक्षार्थी उषा शाक्यं लसकुस व धर्मराज शाक्यं ुभाय् देछानादीगु खः ।