येँ महानगरया आर्थिक व विनियोजन विधेयकलिसें कार्यक्रम व बजेट पारित
येँ (नेपालभाषा टाइम्स) – येँ महानगर पालिकाया आर्थिक व विनियोजन विधेयकलिसें कार्यक्रम व बजेट सर्वसम्मतं पारित जूगु दु । वंगु बुधवाः राष्ट्रिय सभागृहय् च्वंगु नगरसभाया बैठकं वइगु आर्थिक दँ २०८३/०८४या निंतिं येँ महानगरपालिकाया ‘कार्यक्रम व बजेट’, ‘आर्थिक विधेयक’ व ‘विनियोजन विधेयक’ सर्वसम्मतं पारित याःगु खः ।
वंगु असार ४ गते च्वंगु नगरसभाया १९ क्वःगु अधिवेशनया प्यक्वःगु बैठकय् कार्यवाहक प्रमुख सुनिता डंगोलं २५ गू अर्ब ८८ गू करोड स्वीगू लख व न्यय्न्याद्वः तका दांया बजेट, कार्यक्रम, आर्थिक विधेयक व विनियोजन विधेयक न्ह्यब्वयादीगु खः । गुकियात बुधवाः च्वंगु बैठकय् व्यापक सहलह लिपा उकियात पारित याःगु खः । पारित बजेटमध्ये सञ्चित कोषय् व्ययभार लाइगु २५ गू अर्ब १३ गू करोड ३० गू लख न्यय्न्याद्वः व वाह्य व्ययभार जुइगु ७५ गू करोड तका यानाः ७५ नीन्यागू अर्ब ८८ गू करोड ३० गू लख न्यय्न्याद्वः दु ।
बुधवाःया बैठकया कार्यसूचीइ ल्याः १ निसें ३ तक वइगु आर्थिक दँया ‘कार्यक्रम व बजेटय् सहलह यानाः पारित यायेगु’, ‘विनियोजन विधेयक २०८३’ व ‘आर्थिक विधेयक २०८३’ सहलह यायेगु व पारित यायेगु विषय दुथ्याकातःगु खः ।
सभाय् नगरसभाया दुजःपिं आशामान संगत, रोजिना श्रेष्ठ, उदय चुडामणि वज्राचार्य, मचाराजा महर्जन, चन्द्रमान तुलाधर, अनिलकुमार श्रेष्ठ, हिरादेवी पोखरेल, सीता विसुन्के, भगवान बुढाथोकीय्, सन्तोष ढुंगेल, रचना सुनाम, शर्मिला परियारपिंसं प्रस्तावयात कयाः संशोधनसहित व्यवस्थापन व कार्यान्वयनय् यायेमाःगु सुझाव बियादीगु खः ।
बैठकय् विधायन समितिया संयोजकलिसें २३ वडाअध्यक्ष मचाराजा महर्जनं सभाया कार्यसूचीया ४ गूगु ल्याखय् दुगु ऐन संशोधन सम्बन्धी प्रस्ताव न्ह्यब्वयादीगु खः ।
वय्कलं ‘जनस्वास्थ्य ऐन-२०८० या न्हापांगु संशोधन-२०८३’, ‘शिक्षा ऐन– २०७५ या निगूगु संशोधन-२०८३’, ‘विवाद निरुपण (कार्यविधि) ऐन– २०७५ या न्हापांगु संशोधन-२०८३’, ‘विपद व्यवस्थापन ऐन २०७७ या न्हापांगु संशोधन-२०८३’ व ‘कर्मचारी सेवा ऐन-२०७७ या प्यंगूगु संशोधन-२०८३’ न्ह्यब्वयादीगु खः ।
नगरसभाया बैठकय् न्ह्यब्वःगु ऐनया विषय व मेमेगु प्रस्तावय् सहलह यायेत वइगु असार २३ गते मंगलाः न्हिनसिया ३ ताः इलय् न्याक्वःगु बैठक च्वनी ।
LEAVE YOUR COMMENTS