त्रिवि सेवा आयोगय् राजनीतिक नियुक्ती जूगु दावी
येँ (नेपालभाषा टाइम्स) – नेपाल प्रगतिशील प्राध्यापक संगठनं त्रिभुवन विश्वविद्यालय (त्रिवि) सेवा आयोगया अध्यक्षय् दलीय बफादारीताया आधारय् राजनीतिक नियुक्त याःगु धासें आपत्ति प्वंकूगु दु । जीवंकाछि अनुसन्धान व प्राज्ञिक नीति निर्माणय् अमूल्य ई फ्याःपिं प्रतिष्ठित प्राध्यापकतय्गु अवमूल्यन यासें दलीय बफादारीताया आधारय् नियुक्ति याःगु धासें संगठनं ध्यानाकर्षण याकूगु खः ।
संगठनया वरिष्ठ उपाध्यक्ष मनोज विष्टं म्हिगः जारी याःगु विज्ञप्तिइ गुगुं नं इलय् प्रशासनिक क्षेत्रय् दुम्ह व आः छगू दलपाखें राजनीतिक नेताया छवि दयेकाच्वंम्ह व्यक्तियात थज्याःगु गरिमामय पदय् तयेगु धइगु आम प्राध्यापक जगतया हे मानमर्दन जूगु खँ धयातःगु दु । कुलपतिं तकं जुयाच्वंम्ह प्रधानमन्त्री बालेन साहं त्रिवि सेवा आयोगया अध्यक्षय् किशोरे थापायात नियुक्ति याःगु खः । थुगु निर्णय प्रति आपत्ति प्वंकूसें संगठनं वंगु ईया ऐतिहासिक उपलब्धीयात लुमंकूसें वर्तमान सरकारया पलाःयात स्वेच्छाचारी व प्रतिगमनया द्योतक जूगु खँ धाःगु दु । उकथं हे संगठनं सरकारं हयेत्यंगु उच्च शिक्षा विधेयकया मस्यौदायात तकं प्रतिगामिया संज्ञा बिउगु दु ।
जनआन्दोलनया भावना व अन्तरिम सरकारया पालंनिसें प्रधानमन्त्री कुलपति मजुइगु कथं स्वायत्त ढंगं विश्वविद्यालय चले यायेगु मोडेल तयार जुइधुंकूगु अवस्थाय् न्हूगु मस्यौदाय् हाकनं प्रधानमन्त्री कुलपति जुइगु व राजनीतिक नेतृत्वया इशाराय् विद्यालय न्ह्याकेत्यंगु दाबी नं ध्यानकर्षण पतिइ यानातःगु दु ।
सरकारया थज्याःगु पलाखं विश्वविद्यालयया स्वायत्तता, प्राज्ञिक स्वतन्त्रता व लोकतान्त्रिक आचारणय् प्रहार जूगु धासें संगठनं उच्च शिक्षाया गरिमा ल्यंकेगु पवित्र अभियानय् ऐक्यबद्धता प्वंकेत प्राध्यापक, विद्यार्थी, बुद्धिजीवी व सरोकारवालातय्त इनाप नं याःगु दु ।
LEAVE YOUR COMMENTS