झझः धायेक न्यायेकूगु ‘रातोघर साहित्य उत्सव’
स्वनिगः विशेषतः नेवाः बस्ती खः । थीथी इलय् स्वनिगःयात कयाः बहस जुइगु यानाच्वंगु दु । थज्याःगु छगू बहस वंगु शुक्रवा रातोघर साहित्य उत्सवय् जूगु दु ।
वंगु शुक्रवाः नेपालभाषा मंकाः खलःया छेँय् जूगु थ्व ज्याझ्वः थीथी विशेषतां जाःगु अनुभव जूगु दु । उकी मध्ये छगू खः – लसकुस यायेगु न्हूगु पहः । ज्याझ्वलय् ब्वति कायेत वःपिंत तामाङ समुदायपाखे कोकोम्हेन्दो सिन्हः तिका, प्रसाद धकाः मरि बियाः सियातःगु कःनिलिसे मोहि नं त्वंकूगु खः । तामाङ संस्कृति व नेवाः संस्कृति न्ह्यब्वइकथं टुङ्ना, डम्फु व धिमे थानाः लसकुस याःगु खः ।
दबुलिइ रातोघर फाउन्डेसनया अध्यक्ष स्नेह साय्मिं लसकुस न्वचु बीगु झ्वलय् साहित्य व सम्पदा संरक्षणया निंतिं ज्याझ्वःया ग्वसाः ग्वयागु जानकारी बियादिल ।
ज्याझ्वःया न्हापांगु सत्रय् नेपाली भासं कविता ब्वनेगु ज्या जूगु खः । ज्याझ्वलय् धीरकुमार श्रेष्ठ, उषा शेरचन, लक्ष्मी माली, भीष्म उप्रेती, अभय श्रेष्ठ, रजनीमिला, उत्तम राउत, गीता त्रिपाठी, रजनी ढकाल, सुलोचना मानन्धर धिताल, प्रोल्लास सिन्धुलीय, दीपक सापकोटा, भोजराज न्यौपाने, रामगोपाल आशुतोष, रसिकराज, शकुन्तला जोशी, लक्ष्मी रुम्बा, सुमन थापा सङ्गम, विणा नेम्कुल, रिता खत्री, किसन पौडेल, जुमन किरण आदि कवि/कवयित्रीपिंसं सम्पदा, सभ्यता व समाजयात कयाः चिन्तन यानातःगु थीथी कविता न्यंकादीगु खः । थुगु ज्याझ्वःया सहजीकरण कवि विश्व सिग्देलं यानादीगु खः ।
थ्वयां लिपा सम्मान ज्याझ्वः जूगु खः । उगु ज्याझ्वलय् नेपालभाषाया वरिष्ठ साहित्यकार, निर्देशक लिसें ‘शुक्रवाःया तँसापौ’या सम्पादक रमेशकाजी स्थापितयात ‘रातोघर च्वसा हना’ लःल्हाःगु खः ।
अथेहे प्रा.डा. शंकरमान राईयात वय्कलं किपूया बर्न सेन्टरय् मिं पुनाः वासः यायेत वइपिं आर्थिक अवस्था कमजोरपिंत थीथी कथं ग्वाहालि यानाच्वनादीगुयात कदर यासें ‘रातोघर उत्कृष्ट सेवा सम्मान’ लःल्हाःगु खः ।
वय्कःपिं निम्हेसितं म्हतिं २५ द्वः व २५ तका दुगु दांम्हिचा लःल्हागु खः । सम्मानित व्यक्तित्वपिनिगु म्हसीका बीगु ज्या फाउन्डेसनका उपाध्यक्ष वासुदेव अधिकारीं यानादीगु खः ।
थ्वयां लिपा कवि स्नेह साय्मिया नेपाली कविता संग्रह ‘पुल र पर्खालहरू’ यात नेपालभाषां भाय् हीकूगु सपूm ‘ताँ व पःखाःत’ या विमोचन जुल । सुरेशकिरण लुमन्ति गुथिं पिथंगु उगु सफूया भाय् हिलेगु ज्या रमेशकाजी स्थापितं यानादीगु खः ।
स्वंगूगु सत्रय् ‘यो सहर कसको हो ?’ विषययात कयाः विमर्श यायेगु ज्या जुल । उगु विमर्श ज्याझ्वलय् आर्किटेक्चर लिसें सम्पदाविद् डा. सुदर्शनराज तिवारी व नेपालभाषा एकेदेमीया चान्सलर लिसें वरिष्ठ साहित्यकार मल्ल के. सुन्दरं स्वनिगलं तना वनाच्वंगु मौलिक संस्कृति, सम्पदा व सभ्यता संरक्षणय् वयाच्वंगु हाथ्यायात कयाः थःथःगु बिचाः प्वंकादीगु खः । उगु सत्रया सहजीकरण दीपक समीरं यानादीगु खः ।
छगू भाष्य दु, स्वनिगः स्यनावनाच्वन । स्वनिगः सुनां स्यंकल ले सा ? थ्वहे विषयय् जूगु मेगु प्यानल सहलहय् ‘स्वनिगः, याम्बु र सम्पदाको शहर’ विषयय् दुग्ययेक सहलह जुल । उगु ज्याझ्वलय् येँ महानगरपालिकाया कार्यवाहक प्रमुख सुनिता डंगोल, यल महानगरपालिकाया उपप्रमुख मञ्जली शाक्य वज्राचार्य व मध्यपुर थिमि नगरपालिकाया उपप्रमुख विजयकृष्ण श्रेष्ठं ब्वति कयादीगु खः ।
फाउन्डेसनया अध्यक्ष स्नेह साय्मिं हे सहजीकरण यानादीगु उगु ज्याझ्वलय् जनप्रतिनिधिपिंसं संस्कृति संरक्षण, मौलिक संरचनाया संबद्र्धन लिसें विकास योजनाबारे थःथःगु धापू तयादीगु खः । सहलहया दथुइ विकासया नामय् स्वनिगःया मौलिक बस्तीइ डोजर चले यायेगु ज्यां स्वनिगःया संस्कृति हे न्हना वनेफइगु खँय् नं चर्चा जूगु खः । वय्कः जनप्रतिनिधिपिंसं स्वनिगःया अज्याःगु बस्ती ल्यंकेगु निंतिं थःथःगु थासं कुतः यायेगु बचं बियादीगु खः ।
दकलय् लिपाया सेसनय् मातृभाषी चिनाखँ ब्वनेगु ज्या जूगु खः । उगु ज्याझ्वलय् नारद वज्राचार्य, नवीनप्रकाश श्रेष्ठ, विणा थिङ, अजितमान लामा, ईश्वर थोकर, चन्द्रबहादुर लामा, वसन्त नकर्मी, हिसिलिना शाक्य, रहेना नकर्मी मानन्धर, रश्मि नापित, रितेश त्रिपाठी, तिलक चाम्लिङ राई, राजेश्वरी राजोपाध्याय, अर्जुन महर्जन व राज अक्ष्योभ्य आदि कवि/कवयित्रीपिंसं थःथःगु कविता न्यांकादीगु खः । उगु सत्रया सहजीकरण रजनी मिलां यानादीगु खः ।
समापन ज्याझ्वलय् फाउन्डेसनया महासचिव लिसे बुढानिलकण्ठ नगरपालिकाया उपप्रमुख अनिता लामां आः वइगु इलय् नं साहित्य, संस्कृति व सेवाय् योगदान याइपिं व्यक्तित्वतय्त सम्मान यासें थज्याःगु ज्यायात निरन्तरता बीगु बचं बियादिल । अध्यक्ष स्नेह साय्मिं मौलिक सम्पदा व साहित्ययात केन्द्रय् तयाः थप ज्याझ्वः यायेगु प्रतिबद्धता प्वंकादिल ।
ज्याझ्वः क्वचायेधुंकाः नेवाः परम्परा कथं समय्बजि नकेगु ज्या जूगु खः । वर्तमान कविता समूह, सुरेशकिरण लुमन्ति गुथि व नेपालभाषा मंकाः खलः सहआयोजक जुयाः न्यायेकूगु थुगु तःजिगु उत्सवया सकतां ज्याझ्वः कवि रमिप्रियां न्ह्याकादीगु खः ।
LEAVE YOUR COMMENTS