पीआरधारी कर्मचारीतय्त बर्खास्त यायेगु तयारी
मेपिं कर्मचारीतय् बारे नं अनुसन्धान सुरु, प्रमाणित यायेत थाकुइगु विज्ञतय् धापू
येँ (नेपालभाषा टाइम्स) – सरकारं विदेशय् च्वनेगु निंतिं स्थायी आवासीय अनुमति कयातःपिं निजामति कर्मचारीतय्त बर्खास्त यायेगु प्रक्रिया न्ह्याकूगु दु । थ्व प्रक्रियाय् दकलय् न्हापां प्यम्ह कर्मचारीतय्त बर्खास्त यायेगु तयारी सुरु जुइधुंकूगु खँ धाःदु । थुकिया लिसें थथे स्थायी आवासिय अनुमति कयातःपिं मेपिं कर्मचारीतय् बारे नं अनुसन्धान न्ह्यायेधुंकूगु खँ धाःगु दु ।
भूमि व्यवस्था, सहकारी, संघीय मामिला तथा सामान्य प्रशासन मन्त्रालयं आवासीय अनुमति कयाः ताःई तक कार्यालयय् मवःपिं निजामति कर्मचारीतय्त आः धमाधम स्पष्टीकरण कायेगु सुरु यानाहःगु दु । थ्व झ्वलय् प्यम्हेसित कारवाही यायेत्यंगु खः । उमित भविष्यय् सरकारी सेवाय् ज्या यायेत अयोग्य जुइकथं कारवाही यायेत्यंगु खँ धाःगु दु । मन्त्रालयं थज्याःगु अनुमति कयातःपिं मेपिं कर्मचारीतय्त नं झिंन्यान्हुया दुने सफाइ बीत मौका बिउगु दु ।
निजामति सेवा ऐन २०४९ कथं निजामति कर्मचारीतय्सं विदेशय् स्थायी बसोबास अनुमति कायेमदु । थुगु ऐनय् अनुमति काःपिं जक मखु, अनुमति कायेगु प्रक्रिया न्ह्याकूपिंत तकं कारवाही यायेगु प्रावधान तयातःगु दु । २०७२ सालय् याःगु ऐनया प्यक्वःगु संशोधनं डिभी व पीआर लिसें ग्रीनकार्ड थेंज्याःगु स्थायी बसोबासया अनुमति काये मदइगु व्यवस्था याःगु खः ।
सामान्य प्रशासन मन्त्रालयया प्रवक्ता एकदेव अधिकारीं विदेशी आवासीय रुपं च्वनेगु अनुमति काःपिं सरकारी कर्मचारी नेपाःया कानुन कथं सजाय बीबहःगु कसूर याःगु ठहर जुइ । वय्कलं आः बर्खास्त यायेगु तयारी जुयाच्वंपिं प्यम्हं कर्मचारीत अध्ययन विदा धकाः विदेशय् वनाः अन हे च्वनाच्वंपिं खः ।
प्रवक्ता अधिकारीं मेमेपिं कर्मचारीतय् बारे नं मन्त्रालयय् सुचं वयाच्वंगु व उगु सुचं कथं अनुसन्धान जुयाच्वंगु खँ धयादिसें यदि पीआर, टिआर कयातःगु प्रमाणित जुल धाःसा उमित बर्खास्त यायेगु तक कारवाही जुइगु खँ धयादिल । वय्कलं थुकिया निंतिं विदेशी कुटनीतिक नियोगलिसे समन्वय यानाः पीआर टिआर काःपिं कर्मचारीतय् बारे अनुसन्धान जुयाच्वंगु खँ नं धयादीगु दु ।
कुटनीतिक नियोगलिसे समन्वय यानाः अनुसन्धान यायेगु धाःसा थ्व ज्याय् यक्व थाकुइगु विज्ञतय् धापू दु । विशेषत अमेरिका व युरोपया यक्व देशय् दोहोरो नागरिकताया व्यवस्था दुगुलिं उमिसं थः नागरिकतय् विवरण बी चाहे जुइमखु, अथे जूबलय् समन्वय हे जूसां विवरण चूलाकेत धाःसा थाकुइगु धापू विज्ञतय् दु ।
थ्वयां न्ह्यः लालबाबु पण्डित सामान्य प्रशासन मन्त्री जूबलय् डिभी, पीआर काःपिं कर्मचारीतय्त पदमुक्त यायेगु अभियान न्ह्याकूगु खः । निजामति सेवा ऐनया प्यक्वःगु संशोधनय् पीआर, डिभी काःपिंत सरकारी सेवाय् अयोग्य जुइकथं बर्खास्त यायेगु व्यवस्था यायेवं गुलिखे कर्मचारीतय्सं राजीनामा बिया वंगु खः । अथे खःसां आः नं यक्व हे कर्मचारीत पीआर, डिभी कयातःपिं दुगु खँ लोकसेवा आयोगया पुलांम्ह अध्यक्ष उमेश मैनालीं धयादीगु दु ।
कानुन कार्यान्वयनय् बेवास्ता जूगुलिं लिपा लिपा वःपिं कर्मचारीतय्सं नं पीआर डिभी कयातःगु दुगु खँ वय्कलं धयादी । वय्कःया कथं लालबाबु पण्डित मन्त्री जूबलय् भचा कडाइ जूगु खःसा वय्कः लिपा हाकनं थुकी बेवास्ता जूगु खः । पण्डित मन्त्री जुयाच्वंगु इलय् बढुवा जुइत्यंपिं गुलिखे कर्मचारीतय्सं पीआर त्वःतावःगु खँ नं वय्कलं लुमंकादी । तर पतिंचाय् ल्याखायेफइ कथं जक कारवाही जूगुलिं कर्मचारीत पीआर, डीभी कायेत लालायित जुयाच्वंगु खँ वय्कःया दावी दु ।
LEAVE YOUR COMMENTS