‘नेवाः समुदायलिसे नुगः ब्याके मानि’

न्हूदँ कुन्हु स्वंगू सभाय् प्रधानमन्त्रीया ब्वति

येँ – प्रधानमन्त्री केपी शर्मा ओलीं आः वइगु न्हूदँया लसताय् बसन्तपुली जुइगु सभाय् वयाः गुथि विधेयक बारे थःगु बिचाः तयेगु खँ कनादीगु दु । न्हूदँ कुन्हु बसन्तपुली जुइगु सभाय् मूपाहां कथं ब्वति कायेत ब्वनापौ बीगु लागिं वंगु न्हूदँ राष्ट्रिय समारोह समिति–११४० या प्रतिनिधितलिसे खँ ल्हासें वय्कलं थ्व खँ कनादीगु खः ।

न्हूदँ हनेगु लागिं बसन्तपुली मुनीपिं नेवाः समुदायया दथुइ थःगु नुगःखँ ब्याके मानि धासें वय्कलं धयादिल, ‘बसन्तपुली जुइगु सभाय् जि वये । स्वनिगःया नेवाः समुदाय दथुइ जिगु छुं खँ तयेमानिगु दनि । गुथि विधेयकयात कयाः नेवाः समुदाययात गुगु समस्या जूगु खः, उकियात कयाः जिं न्ववाः वये ।’

नेवाः पासापिनिगु हे सुझाव कथं गुथि विधेयक लित कयागु खँ न्ह्यथँसें विधेयकय् स्वनिगःया गुथि परम्परा व मेगु लागाया गुथि परम्परायात छथासं तयेगु ज्या जूगुलिं समस्या उत्पन्न जूगु बिचाः नं वय्कलं तयादिल । प्रम ओली असंलग्न राष्ट्रतय्गु सम्मेलनय् ब्वति कायेत थौं अजरबैजानया राजधानी बाकु झायेत्यंगु दु ।

वयां लिपा वय्कः हानं स्वास्थ्य उपचारया लागिं नं विदेश वनेगु तयारी जुयाच्वंगु दु । उपचार सिधयेकाः वयाखतं थः नेपाल संवत् ११४० कछलाथ्व पारु (कार्तिक १२ गते) मंगलवाः बसन्तपुली जुइगु सभाय् सम्बोधन यायेत वयेगु बचं बियादीगु खः ।

न्हूदँ समारोह समिति–११४० या नायः रमेश महर्जनया नेतृत्वय् वंगु प्रतिनिधि मण्डलय् सत्तारुढ दल नेकपाया प्रवक्ता नारायणकाजी श्रेष्ठ, संघीय सांसद जीवनराम श्रेष्ठ, प्रदेश ३ या सांसद बसन्त मानन्धर, पुलांम्ह राज्यमन्त्री दिलीप महर्जन, भाषासेवी लक्ष्मीदास मानन्धर, डा. चुन्दा वज्राचार्य लिसें न्हूदँ समारोह समितिया मेपिं पदाधिकारीपिं दुथ्याःगु खः ।

वय्कःयात म्हिगः हे थिमिया राष्ट्रिय विभूति शंखधर साख्वाः प्रतिष्ठानपाखें नं थिमिइ जुइगु ज्याझ्वलय् मू पाहां कथं ब्वति कायेत ब्वनापौ बिउगु खः । प्रम ओलीं न्हूदँ कुन्हु दकलय् न्हापां थिमि, अनं यलय् व अनंलि येँया बसन्तपुली जुइगु न्हूदँ ज्याझ्वलय् ब्वति कयादी ।

कार्तिक १३ य् बिदाया तयारी
ने.सं. कछलाथ्व दुतिया (कार्तिक १३ गते) नेवाःतय् किजापुजा यायेगु लागिं बिदा बीगु बचं नं प्रम ओली प्रतिनिधिमण्डल बियादिल । बिदाया लागिं आवश्यक टिप्पणी व भ्वं मिले यायेगु ज्या लिपा यानाः जूसां वकुन्हु सार्वजनिक बिदाया घोषणा याकेगु खँ वय्कलं कनादीगु खः । बरु वकुन्हु देय्न्यंकं बिदा मबिसे नेवाःतय् बाहुल्यता दुगु प्रदेश नं. ३ य् जक बिदा बीकेगु खः कि धकाः बिचाः जुयाच्वंगु खँ नं वय्कलं कनादिल ।

सम्बन्धित बुखँ

LEAVE YOUR COMMENTS