वाकबज्र मैत्री समाजया प्यक्वःगु बुदिं

येँ (नेपालभाषा टाइम्स) – वाकबज्र मैत्री समाज (श्री वाकबज्र अध्ययन मण्डल)या प्यक्वःगु बुदिं हनाज्याझ्वः वंगु शनिवाः छगू ज्याझ्वःया दथुइ खुसिबुँःस्थित नेपाः ब्यांक्वेट जुल ।

वाकबज्र मैत्री समाज (वाकबज्र अध्ययन मण्डल) या नायः सजनरत्न वज्राचार्यया सभापतित्वय् जूगु ज्याझ्वलय् मूपाहां येँ महानगरपालिकाया प्रवक्ता नापं येँमपा १७ वडा अध्यक्ष नविन मानन्धरं त्वाःदेवाय् मत च्याकाः उलेज्या यानादीगु खः ।

येँय् देया मूलचक्रेश्वर फणीन्द्ररत्न वज्राचार्यंं त्रिरत्न शरण गमन याकाः न्ह्याःगु ज्याझ्वलय् संःथाया न्वकु अनिलचन्द्र वज्राचार्यंं लसकुस यानादीगु खः । ज्याझ्वलय बौद्ध विदुषि सुमति वज्राचार्य, लोटस रिसर्च रेन्टरया नायः प्रा. सुरेन्द्रमान वज्राचार्य, अध्ययन मण्डलया संरक्षक एवं गुरुजु राजु वज्राचार्य, मूपाहां नविन मानन्धर व सभापति सजनत्न वज्राचार्यपिंसं संःथायात कयाः थःपिनि नुगःखँ तयादीगु खः ।

ज्याझ्वलय् मूपाहां मानन्धरं संःथाया संःथापक नायःलिसें संरक्षक राजु वज्राचार्यं च्वयादीगु ‘बाधा’ (बाःह्राः) सफूया पितब्वज्या लिसें वाकवज्र अध्ययन मण्डलपाखें वज्रयान बौद्ध पुजाविधि स्यनेकने प्रशिषण कयादीपिं थीथी तहया ब्वँमिपिंत दसिपौ नं लःल्हानादीगु खः ।

वज्रयान धर्मया कर्मकाण्ड पूजाविधि पिण्ड विधान, प्रशिक्षण ज्याझ्वलय् उत्कृष्ट जुयादीम्ह चर्तुब्रम्ह महाविहार ख्वपया विकेश वज्राचार्ययात ‘पं. सिद्धिहर्ष–धर्महर्ष सिरपा’ व मतिनाया चिं नापं वज्रयान धर्मया कर्मकाण्ड पूजाविधि गुरुमण्डलाचारण व कलश, मामकि पूजा प्रशिक्षण ज्याझ्वलय् उत्कृष्ट जुयादीम्ह ब्रम्हचक्र महाविहार, ओमबाहाःया सुप्रिमहर्ष वज्राचार्ययात ‘पूर्वकुमारी चिनीकुमारी सिरपाः’ लःल्हाःगु खः ।