ने. सं. ११४४ ञलाथ्व पुन्हि - येँया: पुन्हि

असंया गाडी निषेध विवादय्

येँ – थनिंनिसें येँया असं लागाय् सुथय् ७ बजे निसें बहनी ७ बजे तक गाडी दुमकायेगु धकाः जूगु निर्णय व्यवस्थित मजूगु बिचाः असं व वंघः लागाया स्थानीय मनूतय्सं तःगु दु । उकिं थ्व निर्णययात व्यवस्थित यानाः जक लागू यायेत थ्व लागाया थीथी झिगू संस्थां ज्ञापनपत्र बिउगु दु ।

येँ मनपा व उपत्यका ट्राफिक प्रहरीं थनिनिसें असं व वंघः लागाय् प्यचाः घःचा दुगु गाडी दुमकायेगु निर्णय याःगु खः । उकिया विरोधय् स्थानीय झिगू संस्थां उगु लागा लिसे स्वाःगु न्हय्गू वडाया वडाध्यक्ष व डिआईजी सर्वेन्द्र खनालयात ज्ञापनपत्र बिउगु खः । स्थानीयवासीं गाडी दु हे मकायेगु मखुसें सुथय् ८ बजे निसें बहनी ८ बजे तक ट्याक्सी व प्राइभेट गाडीयात ‘वन वे’ जक यानाः चले याकेमाःगु माग याःगु दु ।
तर २५ वडाया वडाध्यक्ष निलकाजी शाक्यं थ्व विरोधया निंतिं विरोध जक जूगु धासें ज्या हे मयायेकं विरोध यायेगु पाय्छि मखु धयादिल । वय्कलं धयादिल, ‘दकलय् न्हापां थुकियात लागू निं याना स्वये नु, लिपा गन गन छु गज्याःगु समस्या वइ अन अन भिंकाः वनेगु जुइ ।’
मेखे असन सेवा समितिया यज्ञरत्न तुलाधरं वडाध्यक्षपिंसं थःगु खँ मन्यंगु द्वपं बियादिल । वडाध्यक्ष शाक्ययात नापलानाबलय् वय्कलं आःयात निर्णय कार्यान्वयन यायेगु बाहेक मेगु ज्या जुइ मखु धया हःगु खँ कनादिल ।

क्वःछिनातःगु इलय् मालवाहक गाडी दुमकायेगु निर्णयय् थःपिं सहमत जूगु खँ नं वय्कलं कनादिल ।वडाध्यक्ष शाक्यं सम्पदा ल्यंकेमाः उकिं गाडी दुकायेगु ज्या बन्द यायेत्यनागु खः धयादीगु व स्थानीय संघसंस्थां सम्पदा ल्यंकेगु निंतिं दकलय् न्हापां ल्हाः म्हुतु चूलाकेमाः धकाः लिसः बिउगु खँ नं सीदुगु दु ।वडाध्यक्ष शाक्यं थःपिंसं गाडी वनेगु निंतिं बीमाःगु एक्सेस बियागु धासें कोर एरियाय् गाडी दुमकाल धाःसा छु जुइ धइगु थःपिंं सिउ धयादिल ।

वय्कलं थःपिंसं न्हापा २० दँ न्ह्यःनिसें कार्यान्वयन याये मफयाच्वंगु ज्या कार्यान्वयन यानागु खँ धासें गाडी दुहां मवयाः असंनिसें वंघः लागाय् व्यापारिक रुपं गुगुं नं कथं समस्या मवइगु खँ कनादिल । वय्कलं न्ह्यःने धयादिल, ‘असंया व्यापारयात ल्यंका तयेगु निंतिं हे थुगु निर्णय जूगु खः ।’ गाडी बन्द धकाः फुक्कं बन्द यानागु मखुसें मोटरसाइकल, साइकल आदि धाःसा वयेवने यायेफइगु खँ कनादिसें वय्कलं थुकिं सुयातं मर्का मलाइगु दावी नं यानादिल ।

वय्कलं न्ह्यःने धयादिल, ‘गाडी दुमकायेगु निर्णय यानागु इलय् ज्ञापनपत्र बिउगु संस्थाया पदाधिकारीपिं नं दुगु खः, अन सुम्क च्वनेगु लिपा वनाः विरोध यायेगु ज्या पाय्छि मखु ।’उगु सहलह ज्याझ्वलय् थीथी संस्थाया प्रतिनिधि जक मखु, थीथी क्षेत्रया विज्ञपिं नं दुगु धासें निर्णय कार्यान्वयन मयायेकं थज्याःगु विरोध यायेगु उचित मजूगु खँ नं वय्कलं कनादिल । मेपिंसं धाःसा गाडी बन्द मखुसें वान–वे यानाः जक चले यायेमाःगु खँ धयाच्वंगु दु ।