थिमिया लाय्कूसाःया उलेज्या

थिमि(नेपालभाषा टाइम्स)÷ मध्यपुर थिमि नगरपालिकाया प्रमुख सुरेन्द्र श्रेष्ठं लोप जुइगु अवस्थाय् थ्यंगु मौलिक व पुख्र्यौली पेशाया संरक्षण व प्रवद्र्धन यायेगु खँ धयादीगु दु । नगर प्रमुख श्रेष्ठं पुख्र्यौली पेशा व व्यवसायया संरक्षण व प्रवद्र्धनया निंतिं प्रतिवद्धता प्वंकादिसें नगरपालिकापाखें विशेष ग्वाहालि यायेगु बचं बियादीगु खः ।

मध्यपुरथिमि नगरपालिका वडा नं. ४ स्थित साःननिइ पुनःनिर्माण जूगु ऐतिहासिक व सांस्कृतिक महत्वया लाय्कूसाः (चिकंसाः)या उलेज्या यासें नगर प्रमुख श्रेष्ठं उगु खँ धयादीगु खः । लिसें वय्कलं थुकथंया संरचनालिसें आः साय्मितय् पुख्र्यौली पेशाया रुपय् दयाच्वंगु तू चिकं उत्पादन यायेगु घरेलु उद्योगया पुनरुत्थान यायेमाःगु आवश्यक जूगु नं धयादीगु दु ।

सिवा साय्मि खलःया नेतृत्वय् नगरपालिकाया हे आर्थिक ग्वाहालिइ निर्माण सम्पन्न जूगु चिकंसाः खलःया हे नामय् लालपुर्जा दयेकाः बीगु आश्वासन नं वय्कलं
बियादीगु दु ।

थ्व हे झ्वलय् लाय्कूसाः पुनःनिर्माणलिसें साय्मितय् पुख्र्यौली पेशाया रुपय् दयाच्वंगु व थौंकन्हय् लोपोन्मुख अवस्थाय् थ्यनेधुंकू्रगु तू चिकं उत्पादन यायेगु ज्यायात स्थानीय साय्मितय् मंकाः लगानीइ कम्पनीया रुपय् विकास यायेगु अभियान न्ह्याकागु खलकं जानकारी बिउगु दु । थुकिया निंतिं भक्तपुर चेम्बर अफ कमर्सलिसें ख्वपया थीथी थासय् सघन रुपं च्वना वयाच्वंपिं साय्मितय्ं अभियानय् ग्वाहालि यानाच्वंगु खँ धाःगु दु ।

मध्यपुर थिमियात तू चिकं उत्पादन यानाः आत्मनिर्भर यायेमाःगु खँय् बः बियादिसें उपप्रमुख विजयकृष्ण श्रेष्ठं धयादिल, ‘छुं दशक तक न्ह्यः जि थः हे नं तूचिकं न्या वनाच्वनाम्ह खः । तर थौं अज्याःगु अवस्था मदु । झीसं विदेशी चिकं उपभोग यानाः स्वदेशी उत्पादनयात धरासायी यानाच्वना । उकिं स्वदेशी उत्पादनयात तिबः बीमाःगु दु ।’

पुख्र्यौली पेशालिसें परम्परागत प्रविधियात आत्मसात यानाः स्थानीय उत्पादनयात हे प्राथमिकता बिया वने फत धाःसा आयात प्रतिस्थापन सम्भव दुगु वय्कःया धापू दु ।

खलःया नायः अष्टरत्न मानन्धरं मध्यपुर थिमिया मल्लकालीन लाय्कू परिसर लिक्क च्वंगु जूगुलिं हे थुगु साःयात पुलांसाः वा क्वथुसाः नं धायेगु याना वयाच्वंगु जानकारी बियादिल ।

त्वाःया दकलय् ज्याथम्ह ९१ दँया मोहलाल लाखे मानन्धरया विशेष उपस्थितिइ नगर प्रमुख श्रेष्ठं उलेज्या यानादीगु ज्याझ्वलय् पुलांम्ह नगर प्रमुख मदनकृष्ण श्रेष्ठ, भक्तपुर चेम्बरया अध्यक्ष न्हुछेरत्न मानन्धर, ४ वडाअध्यक्ष बालकृष्ण श्रेष्ठ वडासदस्य रामकेशरी श्रेष्ठ, पूर्व जिसस उमेश श्रेष्ठ लगायतया उपस्थिति दुगु खः । उगु साः गंगाराम मानन्धरया संयोजन व मनोजलाल मानन्धरया नेतृत्वय् निर्माण सम्पन्न जूगु खः ।

सम्बन्धित बुखँ

LEAVE YOUR COMMENTS