वादेसय् रञ्जना लिपि स्यनेज्या
यल – श्रेष्ठ समाज वादेय् व गोदावरी नगरपालिकाया मंका ग्वसालय् न्ह्याःगु लच्छी यंकया निःशुल्क रञ्जना लिपि प्रशिक्षण ज्याझ्वः गोदावरी नगरपालिका ११ वडा ज्याकुथिइ सो मबाः क्वचाये कूगु दु ।
श्रेष्ठ समाजया नायः वासुदे व श्रेष्ठं लसकुस याना न्ह्याःगु ज्याझ्वलय् लच्छीयंक क्लासय् ब्वति कयाः ताःलाःपिं ब्वनामिपिं व संकल्प बज्राचार्य न्हाप, देवान महर्जन ल्यू व सलिना महर्जन लियां ल्यू लाःपिन्त मूपाहाँ उपमेयर मुना अधिकारी, नेपाल लिपि गुथिया नायः निरन्जन ताम्राकार व प्रशिक्षक सुदेन कुमार महर्जनपिसं दसिपौ लःल्हाःगु खः ।
भाषा, संस्कृति थेंजाःगु स्यनेगु धैगु मचांनिसें हे स्यनेमा धैगु दसु कथं उगु प्रशिक्षण ज्याझ्वलय् स्वंगू तगिंनिसे नेपालभाषा स्नातकोत्तर तगिंया ब्वनामिपिं याना मुक्कं सुइखुम्हस्यां लच्छीयंक कक्षाय् च्वना जाँच ब्यूगु खः ।
वडानाप समन्वय याना शंखधरसाख्वाःया झ्वाता तयेया नितिं आः वइगु आर्थिक वर्षया न्हूगु बजेटय् उकियान व्यवस्था यायेगु बचं मूपाहाँ उपमेयर अधिकारीं बियादीगु दु ।
भाय्यात प्राथमिकता बिइमा भाय्यात गबले नं अपमान व अपहेलना यायेमज्यूगु खँ भ्यालि स्कूलया प्रिन्सिपल रबिन शर्मां धयादिलसा उकियात माःगु ग्वाहालि याये गु बचं ११ नं वडा अध्यक्ष नील कुमार देसारं बियादीगु दु ।
नेपाल लिपि गुथिया नायः ताम्राकारं रञ्जना लिपि धैगु पुलांगु लिपि नापं देय्या धरोहर जूगु धासें उकियात सुनां छ्यलाबुला हया नाला काइ इमिगु हे जुइगु खँ धयादीगु दु ।
थःपिसं सयेकेत सुरुआत याःगु रञ्जना लिपियात धैर्यतापूर्वक प्राक्टिस याना छुनं कथंया दसिपौ , ब्वनापौ , हनापौ , सुभायपौ , लसतापौले छ्यलेत प्रशिक्षक महर्जनं ब्वनामिपिंत इनाप याःगु दु ।
LEAVE YOUR COMMENTS