भारतय् कोरोना अप्वयेवं नेपालय् भीड मयायेत इनाप

येँ – भारतय् कोरोना संक्रमण अप्वया वनेवं स्वास्थ्य तथा जनस्वास्थ्य मन्त्रालयं म्हिगः छगू प्रेस विज्ञप्ति जारी यासें नेपालय् नं भिडभाड जुइगु छुं नं कथंया ज्या मयायेत व स्वास्थ्य मापदण्ड नालेत इनाप याःगु दु ।

लिपांगु छुं वालंनिसें भारतय् कोरोना संक्रमणया ल्याः अप्वया वनेवं म्हिगः मन्त्रालयया प्रवक्ता जागेश्वर गौतमं छगू प्रेस विज्ञप्ति जारी यासें सतर्कता नालेत इनाप याःगु खः । भारतय् संक्रमितया ल्याः अप्वयेवं उकिया लिच्वः नेपालय् लाये फइ धासें सरकारं सतर्कता नालेत इनाप याःगु खः ।

थ्वहे झ्वलय् भारतय् कोरोना संक्रमितया ल्याः तीव्र रुपं न्ह्यानाच्वंगु दु । वंगु शनिवाः जक भारतन्यंकं ४० द्वः स्वयां अप्वः संक्रमितत लूगु खः । थ्व ल्याः न्हिथं जुयाच्वंगु संक्रमित स्वयां अप्वः जूगु खँ भारतीय सञ्चारमाध्यमं धाःगु दु ।

वंगु छुं न्ह्यवंनिसें भारतय् अप्वया वनाच्वंगु संक्रमणयात निगूगु लहर जुइ फइगु आशंका यानातःगु दु । विशेष यानाः भारतया महाराष्ट्र, कर्नाटक, केरला, पन्जाब, मध्यप्रदेश व गुजरात लगायत राज्यय् संक्रमणया ल्याः अप्वया वनाच्वंगु दु ।

आः संक्रमण अप्वया वनाच्वंगु थीथी राज्यय् आपालं नेपाःमिं रोजगारीया निंतिं वनाच्वंगु खःसा आः उपिं हाकनं नेपालय् लिहां वयेगु क्रम शुरु जूगु दु ।

भारतया थीथी राज्यय् ज्या यानाच्वंपिं नेपाः लिहां वयाच्वंगु दुसां उमित व्यवस्थित रुपं दुकायेगु ज्या धाःसा जुयाच्वंगु मदु ।
भारतया महाराष्ट्र सरकारं राजधानी मुम्बई, न्हू दिल्ली, मध्ये प्रदेशया राजधानी भोपाल, इन्दोर व जबलपुरय् चान्हय् कफ्र्यु जारी यायेधुंकूगु दुसा भारतय् संक्रमण अप्वया वनेवं उकिया लिच्वः नेपाःमिं ज्यामितय्त लाइगु खँ धाःगु दु ।

थ्वहे झ्वलय् कोरोना भाइरसया संक्रमण युरोपियन देशय् नं अप्वया वनाच्वंगु दु । युरोपया बेलायत, इटली लगायत थीथी देशय् कोरोन संक्रमण अप्वया वनेवं अन हाकनं ‘लकडाउन’ यायेगु क्रम नं शुरु जूगु दु । इटाली न्हापा ज्याथाजिथियात जक कोरोना भाइरस संक्रमण जुयाच्वंगु खःसा आः वयाः ल्याय्म्हपिं नं संक्रमित जुइगु क्रम अप्वया वनाच्वंगु दु ।