प्रेस व अभिव्यक्ति स्वतन्त्रता संकुचित याइगु कानून महयेत माग

येँ –  नेपाल पत्रकार महासंघं प्रेस स्वतन्त्रतायात संकुचित याइकथंया छुं नं नीति, ऐन, कानून मदयेकेत माग याःगु दु । लिसें महासंघं उकथंया नियमावली, निर्देशिका व संरचनातकं मदयेकेत नं धाःगु दु । नेपाःया संविधान प्रदत्त प्रेस व स्वतन्त्रता अभिव्यक्तिया पूर्ण प्रत्याभूति यासें संचारसम्बन्धी कानून व संरचना निर्माण यायेत स्वंगुलिं तहया सरकारयात माग याःगु दु ।

थ्व हे फागुन ९ व १० गते पोखराय् जूगु महासंघया केन्द्रीय साधारणसभां पारित याःगु प्रस्तावया बारे जानकारी बीगु ल्याखं वंगु भदौ १ गतेनिसें लागू जूगु न्हूगु मुलुकी देवानी व फौजदारी संहिताया प्रेस स्वतन्त्रतायात लिच्वः लाइकथंया प्रावधान भिंकेत माग यायेगु प्रस्ताव पारित जूगु महासंघं जारी याःगु विज्ञप्तीइ धयातःगु दु ।

अप्वःथें संचारगृहं पत्रकारतय्त क्वःछिनातःकथं पारिश्रमिक, सेवा सुविधा मबिउगु खँ वयाच्वंगुलिं घोषित पारिश्रमिकलिसें सेवा सुविधा अविलम्ब उपलब्ध याकेत नं माग याःगु दु । लिसें सूचना व प्रसारण विभागया ‘न्यूनतम पारिश्रमिक कार्यान्वयन सम्बन्धय् जारी परिपत्रं’ चिधंगु लगानी व स्वरोजगारमूलक संचारमाध्यमयात समस्या जूगु धासं उकियात हाकनं परिभाषित यायेमाःगु नं विज्ञप्तीइ धयातःगु दु ।

पोखराय् जूगु साधारणसभां महासंघया सदस्यता शुद्धिकरण अभियान बः बियाः आवश्यक प्रक्रिया न्ह्याकेत महासंघया केन्द्रीय समितियात निर्देशन बिउगु खः ।

अथे हे स्वीदँ, ख्वीदँ दयेधुंकूपिं पत्रकारलिसें अपांग जूपिं पत्रकारतय्त मासिक भत्ता उपलब्ध याकेत, नेपाःया संचारमाध्यमय् प्रत्यक्ष वा अप्रत्यक्ष रुपं विदेशी लगानी दुत हये मदइगु व्यवस्था यायेत व यदि सुनानं उकथं लगानी हःगु दत धाःसा उकियात तत्काल अवैध घोषणा यायेत नं उगु साधारणसभां माग याःगु महासंघं जानकारी बिउगु दु ।

संविधानं हे व्यवस्था यानातःकथं महासंघय् मिसातय् सहभागिता ३३ प्रतिशत थ्यंकेत माग याःगु दुसा छम्ह मिसा उपाध्यक्ष व छम्ह मिसा दुजः थप यायेत विधान समितियात सुझाव बिउगु दु ।

 

सम्बन्धित बुखँ

LEAVE YOUR COMMENTS