तामाङ ल्होसारय् नेवाः ऐक्यवद्धता

येँ – नेपाःया तामाङ जनजातिं न्यायेकीगु तःधंगु नखः सोमान ल्होसारय् नेवाःतय्सं नं ऐक्यद्धता क्यंगु दु । म्हीग येँया खुलामञ्चय् याःगु सोनाम ल्होसारया मू ज्याझ्वलय् नेवाः समुदायपाखें ज्यापु महागुथिं ब्यानर सहित ब्वति कयाः ऐक्यवद्धता प्रकट याःगु खः ।

म्हीग ज्यापु महागुथिया केन्द्रीय नायः राजभाई जकःमिया नेतृत्वय् ब्यानर सहित वंगु छगू पुचलं सोनाम ल्होसारया ज्याझ्वलय् ब्वति काःगु खः । ज्यापु महागुथिया ब्यानर व धुन्या समेत वंगु उगु पुचलं शान्तिबाटिकांनिसें ¥याली पिकयाः देय् चाःहिलाःलि खुलामञ्चय् जूगु ल्होसार ज्याझ्वलय् ब्वति काःगु खः ।

उगु इलय् ल्होसार ग्वसाः खलकं नेवाः पुचःयात तःजिक लसकुस याःगु खःसा नायः जकःमिं च्वयादीगु पहिचानया म्येँ नं हायेकूगु खः । लिसें अन ज्यापु जातिया धुन्या ब्वज्या नं जूगु खः ।

ल्होसारय् नेवाःतय्पाखें क्यंगु थ्व ऐक्यवद्धतां यानाः अन आः जातीय सद्भावया इतिहास शुरु जुल धकाः यक्वस्यां प्रतिक्रिया बिउगु खँ नायः जकःमिं ‘नेपालभाषा टाइम्स’यात कनादिल । आः ज्यापु महागुथिपाखें थुकथं हे येँय् याइगु मेमेगु जातिया सांस्कृतिक पर्वय् नं ब्वति कयाः जातीय सद्भाव अप्वयेका यंकेगु खँ नायः जकःमिं कनादिल ।