ने. सं. ११४४ ञलाथ्व दशमी -

फास्ट ट्राय्क विरुद्ध याकनं मुद्दा

येँ – नेपाली सेनां दयेकाच्वंगु फास्ट ट्रायकयात कयाः थ्वहे वइगु निन्हु प्यन्हुया दुने मुद्दा दर्ता जुइगु खँ सीदुगु दु । उगु मुद्दा दर्ता यायेगु निंतिं माःगु भ्वं तयार यायेगु ज्या क्वचायेधुंकूगु खँ आदिवासी जनजाति वकिलतय् संगठन लाहुर्निपया महासचिव शंकर लिम्बुं नेपालभाषा टाइम्सयात कनादीगु दु ।

वय्कःया कथं मुद्दा तइपिं थीथी गुथिया प्रतिनिधिया नां वयेधुंकूगु दुसा गुलिखे गुथिया प्रतिनिधि व स्थानीय वासिन्दाया नां वयेगु ज्या लिबानाच्वंगुलिं यानाः मुद्दा दर्ता लिज्यानाच्वंगु खः । वय्कलं आः निन्हु प्युन्हुया दुने हे मुद्दा दर्ता जुइगु खँ कनादिसें थ्व स्वयां न्ह्यः नं सर्वोच्च अदालतय् ख्वनाया छगू स्थानीय संस्थां मुद्दा तःगु खःसां उगु मुद्दा खारेज यानाबिउगु खँ कनादिल ।

थ्व स्वयां न्ह्यः तःगु मुद्दा खारेज याःगु कारण फास्ट ट्राय्क छगू जक जिल्लाय् मखुसें स्वंगू प्यंगू जिल्लाय् नं लानाच्वंगुलिं छगू जक जिल्लां दर्ता याःगु मिले मजू धासें खारेज याना बिउगु खँ नं वय्कलं कनादिल । मुद्दा दर्ता यायेगु झ्वलय् सम्बन्धित पीडित जनतां दर्ता याःगु मखुसें छगू संस्थां दर्ता याःगुलिं पीडितया उपस्थिति मदु धासें उगु मुद्दा खारेज खँ नं वय्कलं स्पष्ट यानादिल ।

तर आः थःपिंसं दर्ता खारेज मजुइ कथं मुद्दा तयेत्यनागु खँ वय्कलं कनादिल । मुद्दा दर्ता यायेत माःगु फुक्कं कथंया प्रक्रिया क्वचायेकेगु ज्या थःपिंसं पूवंके धुंकागुलिं आः दर्ता यायेगु मुद्दा खारेज मजुइगु विश्वास वय्कलं प्वंकादिल । आःया पालय् बोसी गुथि, पर्जा गुथि व बुंगद्यःया पांजुपिंसं मंकाः कथं मुद्दा दर्ता यायेत्यंगु खः ।

थ्व परियोजनापाखें पीडित जुइपिं स्थानीय जनतां थःपिंत सरकारं क्वःछिउगु भावं बीगु मुआब्जा मगाः धकाः आन्दोलन याना वयाच्वंगु खःसां नेपाली सेनां धाःसा फास्ट ट्राय्क दयेकेगु ज्यायात निरन्तरता बियाच्वंगु द्वपं स्थानीय जनतां बिउगु दु । उमिसं आः क्षतिपूर्तिया दां थपे यायेमाः धकाः थ्व मुद्दा तयेत्यंगु खः ।