‘यातायात आन्दोलन जारी हे दु’

येँ – यातायात व्यवसायी महासंघं घोषणा यानातःगु आन्दोलन जारी हे जुयाच्वंगु खँ धाःगु दु । यातायात व्यवसायी महासंघया अध्यक्ष योगेन्द्र कर्माचार्यं छगू वक्तव्य पित बियाः आन्दोलन लित कयागु धाःसां म्हिगः विप्लव माओवादीं नेपाल बन्दया घोषणा यानातःगु जूगुलिं वहे बन्दयात समर्थन याःगु थें जूगुलिं थःपिनिगु आन्दोलन लित कयागु खँ महासंघया वरिष्ठ उपाध्यक्ष ऐनकुमार शाही ‘नेपालभाषा टाइम्स’ यात कनादिल ।

वय्कलं बियादीगु कनादी कथं वइगु वैशाख २७ गते निसें यायेगु धकाः घोषणा यानातःगु व्यवसायीतय् आन्दोलन जारी हे दु ।
म्हीगया आन्दोलन छन्हुया जक जूगु खँ कनादिसें वय्कलं २७ गते निसें अनिश्चितकालीन यातायात बन्द यायेगु तयारी जुयाच्वंगु खँ कनादीगु दु । वय्कलं धयादी, ‘सरकारलिसे वार्ता जुयाः समस्या समाधान जुल धाःसा ला ठीक हे जुल, मखुसा अनिश्चितकालीन यातायात बन्द यायेगु जुइ ।’

थ्वहे झ्वलय् महासंघं सरकारयात वार्ताया माध्यमं समस्या समाधान यायेगु निंतिं आह्वान नं याःगु दु । म्हीग महासंघया आन्दोलनं आपालं जनता प्रभावित जूगु खःसा महासंघया आन्दोलनयात कयाः जनतां आक्रोश नं प्वंका हःगु दु । मेखे न्हू दर्ता जूगु संस्थां धाःसा महासंघया विरोधय् थःपिनिगु यातायात सञ्चालन याःगु खः ।