स्वनिगलय् लागु जुइला ‘स्मार्ट लकडाउन’ ?

कोभिड १९ नियन्त्रणया निंतिं सरकारं गठन यानातःगु निर्देशन समिति सीसीएमसीं स्मार्ट लकडाउन यायेगु तयारी यानाच्वंसां थुकिया अवधारणा कथं स्वनिगलय् लकडाउन यायेफइगु अवस्था मदु । येँ, यल व ख्वप जिल्लाया सिडिओतय्सं हे तुरुन्त लकडाउन मजुइगु खँ धाःगु दु ।

ख्वप जिल्लाया सिडिओ प्रेमप्रसाद भट्टराईनं बिबिसीलिसे खँ ल्हासें अर्थतन्त्र न्ह्याकातयेगु निंतिं नं तुरुन्त लकडाउन कडा यायेगु अवस्था मदुगु खँ धयादीगु दु । वय्कलं संक्रमणया कारण उपचार, वासः, अक्सिजन, आइसियु व भेन्टिलेटरया अभाव जुल धाःसा जक लकडाउन कडा जुइगु खँ धयादीगु दु ।

अथेहे येँया सिडिओ कालीप्रसाद पराजुलीं नं आः जारी जुयाच्वंगु लकडाउन हे प्रभावकारी जूगुलिं आवश्यक जुल धाःसा जक थप कडाइ यायेगु बारे सहलह जुइ धयादीगु दु ।

अथेहे यल जिल्लाया सिडिओ ढुण्डीप्रसाद निरौलां नं मनूतय्के सचेतना अप्वयेधुंकूगुलिं तुरुन्त कडा यायेमाःगु अवस्था मदु धयादीगु दु । वय्कलं धयादीगु दु, ‘स्मार्ट लकडाउन धयागु घटना व तथ्यांक स्वयां लकडाउन कडा यायेगु व ह्वालुकेगु खः । थौंकन्हय् वृहत् रुपं खोप वियाच्वंगु दु, मनूतय्के सचेतना नं अप्वःगु दु, उकी तुरुन्त कडा यायेमाःगु अवस्था मदु ।’

छु खः स्मार्ट लकडाउन

देय्न्यंकं कोरोना संक्रमितत अप्वया वनाच्वंगुलिं आः ‘स्मार्ट लकडाउन’ याइगु चर्चा जुयाच्वंगु दु । कोभिड नियन्त्रणया निंतिं रसरकारं दयेकातःगु निर्देशक समिति सीसीएमसीं नं ‘स्मार्ट लकडाउन’या तयारी यानाच्वनागु खँ धाःगु दु ।

सीसीएमसीया प्रमुख बालानन्द शर्मां देय्या अर्थतन्त्रयात चलायमान यानाः संक्रमण नियन्त्रण यायेगु निंतिं स्मार्ट लकडाउनया तयारी जुयाच्वंगु खँ धयादीगु दु ।
गन अप्वः संक्रमितत दु अन कडा यायेगु व संक्रमण म्हो दुथाय् खुल्ला यायेगु कथं ‘स्मार्ट लकडाउन’ जुइगु खँ वय्कलं धयादीगु दु ।

स्मार्ट लकडाउनया अवधारणा कथं सीसीएमसीं संक्रमणया दर थीथी थाय्यात स्वयाः रेड, एम्बर, एल्लो, ग्रीन व ह्वाइट जोन यानाः न्याब्वय् ब्वथली । थ्व ब्वथला कथं गुगु थाय् गज्याःगु जोनय् लाः व स्वयां लकडाउन कडा वा खुल्ला यायेगु ज्या जुइ ।

गुगु थाय्यात छु जोनय् तयेगु धयागु खँ अन दुपिं संक्रमिततय् ल्याः, न्हापाया वालय् संक्रमण जूगु दर, कोरोनां सीपिनि ल्याः, अस्पतालय् भर्ना जूपिं व आइसीयु व भेन्टिलेटरय् च्वनेमाःपिं विरामीतय् ल्याःया आधारय् क्वःछिइगु जुइ । थुपिं न्यागू आधारय् हरेक छगूयात २०–२० ल्याः बी, अले थ्व ल्याः जोडे यानाः गुगु जोनय् तयेगु धयागु क्वःछी ।
थुकी ६५ ल्याः स्वयाः च्वय् जुल धाःसा रेड जोनया धलखय् तयाः संक्रमण नियन्त्रणय् मवःतले उगु क्षेत्रयात ठप्प याइ । ३५ निसें ६५ ल्याः तकयात एम्बर जोनय् तइसा, थ्व थासय् अत्यावश्यक सेवा व सुविधा बाहेक मेमेगु व्यापार व्यवसाय् ठप्प याइ । १५ निसें ३५ अंकयात एल्लो जोनय् तयाः थुगु थाय् लकडाउन खुल्ला जूसां जोखिमपूर्ण क्षेत्रय् रुपय् तयाः पूवंक खुल्ला याइमखु । अथेहे ६ निसें १५ ल्याःयात ग्रीन जोनय् तयाः म्हो जक कडा याइसा ६ स्वयां म्हो ल्याः दुथाय्यात ह्वाइट जोनय् तयाः पूवंक खुल्ला याइ । थन नं सुरक्षा मापदण्ड व सामाजिक दूरी धाःसा नाले माली ।

थुकिया निंतिं माःगु तथ्यांक संकलनया ज्या स्थानीय निकायलिसे समन्वय यानाः यायेगु खँ शर्मां धयादीगु दु । लिसें वय्कलं गन गुलि कडा यायेगु व गुलि छुट बीगु धयागु निर्णय धाःसा सिडिओ कार्यालयं यायेमाःगु खँ नं धयादीगु दु ।