देय् दबू स्वनिगःया विशेष अभियान

येँ(नेपालभाषा टाइम्स)/नेवाः देय् दबू स्वनिगः विशेष प्रदेशं नेपाल संवत् व मांभायय्या छ्यलाबुलायात कयाः विशेष अभियान न्ह्याकीगु जूगु दु । देय् दबू स्वनिगः विशेष प्रदेश समितिं स्थानीय तहय् भाषा ऐन कार्यान्वयन, नेपाल संवत्या छ्यलाबुला नापं स्थानीय पाठ्यक्रम ब्वंकेगु व्यवस्था याकेया निंतिं विशेष अभियान न्ह्याकेत्यंगु खः ।
देय् दबू स्वनिगः विशेष समितिया आः नकतिनि च्वंगु पूर्ण कमिटीया बैठकं नेवाः देय् दबू येँ, यल व ख्वप जिल्ला समितिनापं दक्वं नगर समितिलिसे जानाः थुगु अभियान न्हयाकेगु निर्णय याःगु खः । स्वनिगः प्रदेश समितिया नायः नविन थेच्वमिया अध्यक्षताय् स्वनिगःया स्वंगू जिल्लाया नायः व पालिकाया नायःपिनिगु उपस्थितिइ च्वंगु मुँज्यां उगु निर्णय याःगु खः ।
मुँज्याय् देय् दबूया केन्द्रीय न्वकु रश्मिला प्रजापति, छ्याञ्जे मचाराजा महर्जन, प्रदेशया निवर्तमान नायः श्रीकृष्ण महर्जन लगायतं आःया अवस्थाय् नेपाल संवत्या प्रयोग, भाषा ऐन कार्यान्वयनलिसें स्थानीय तहया दक्वं ब्वनेकुथिइ स्थानीय पाठ्यक्रम छगूलिसे मेगु स्वानाच्वंगुलिं थ्व अभियानय् प्रदेश, जिल्ला व नगर समिति नापं जानाः न्ह्याकेमाःगु खँय् बः बियादीगु खः ।
संघीय सरकारं स्थानीय तहयात नं न्हियान्हिथंया ज्याखँय् नेपाल संवत् छ्यलेत परिपत्र याःगु, भाषा आयोगं ऐन हे दयेकाः स्थानीय मांभाय्यात छ्यले फइ धकाः सिफारिस याःगु दछि स्वयां अप्वः दयेधुंकूगु अवस्थाय् उकिया अनुगमन यायेगु नापं स्थानीय पाठ्यक्रम अध्ययन अध्यापन याकेगु ज्या जुयामच्वंगु स्थानीय निकायय् उकिया निंतिं उकियात नं कार्यान्वयन यायेकथं विशेष अभियान न्ह्याकेत्यंगु खः ।