यातायात व्यवसायी महासंघया अध्यक्ष लिसें न्याम्ह ज्वन

नेपाल यातायात व्यवसायी महासंघया अध्यक्ष योगेन्द्र कर्माचार्य लिसें न्याम्ह पदाधिकारीतय्त प्रहरीं ज्वंगु दु । सरकारं सिन्डिकेट प्रथा खारेज यायेगु निर्णय याःगु विरुद्ध आन्दोलनय् कुहां वःगु महासंघया पदाधिकारीतय्त गृह मन्त्रालयया निर्देशन कथं प्रहरीं ज्वंगु खः । उमित अत्यावश्यक सेवा अन्तर्गत लाःगु यातायात सेवायात बन्द यानाः आन्दोलनय् कुहां वःगुलिं ज्वनागु खँ प्रहरीं धाःगु दु ।

प्रहरीं अध्यक्ष कर्माचार्यया लिसें वरिष्ठ उपाध्यक्ष विजय स्वाँर, उपमहासचिव वसन्त भण्डारी, कोषाध्यक्ष किरण खड्का व मेम्ह छम्ह व्यवसायीयात ज्वंगु खँ महानगरीय प्रहरी परिसरया प्रमुख एसएसपी विश्वराज पोखरेलं धयादीगु दु । महासंघया महासचिव सरोज सिटौलायात वंगु शुक्रवाः हे ज्वनेधुंकूगु दु ।
मेखे स्वनिगलं पिने च्वंगु यातायात व्यवसायी संघया ज्वंपिं पदाधिकारीतय्त धाःसा प्रहरीं आवंलिसें सवारी साधन बन्द यायेमखु, व कम्पनीइ वने धकाः लिखित भ्वँ याकाः त्वःतूगु दु ।

पूर्व नेपाल यातायात व्यवसायी संघया उपाध्यक्ष उत्तम चौलागाइ व टीका भट्टराई व कोशी बस व्यवसायी संघया नारायण अधिकारीयात शनिवाः सुथय् ज्वनेधुंकाः आवंनिसें सवारी साधन बन्द यायेमखु धयागु लिखित भ्वं याकाः सनिलय् त्वःतूगु खः ।