भोजपुरय् लाखे प्याखं पिथन
येँ(नेपालभाषा टाइम्स)÷ भोजपुरया स्थानीय ल्याय्म्हतय् सक्रियताय् लोप जुइगु अवस्थाय् थ्यने धुंकूगु लाखे प्याखं पिथंगु दु । स्थानीय मौलिक कला, संस्कृतिया रुपय् दुगु लाखे प्याखंया संरक्षण, संवद्र्धन व न्हू पुस्ताया दथुइ पुस्तान्तरण याना यंकेगु ल्याखं लोप जुइगु अवस्थाय् थ्यनेधुंकूगु लाखे प्याखं पिथंगु खः ।
नेवाः समुदायया मौलिक प्याखंया रुपय् दयाच्वंगु लाखे प्याखनय् लिपांगु इलय् भोजपुरया मेमेगु समुदायया नं सहभागिता उल्लेख्य रुपं अप्वया वयाच्वंगु दु । लाखे प्याखं धइगु नेवाः समुदाया जक खः धइगु मूल्य मान्यतायत त्वाःथलाः लिपांगु इलय् थनया दक्वं समुदायया सहभागिताय् परम्परा ल्यंकेगु ल्याखं अभियान हे न्ह्याकाः लाखे प्याखं पिथनेगु ज्या जूगु स्थानीय नविन बुढाथोकीं कनादीगु दु ।
वंगु गुंलाथ्व नागपञ्चमिनिसें शुरु जुइगु लाखे प्याखं भोजपुरय् धाःसा शुक्रवाःनिसें विधिवत रुपं पिथनाः थीथी थासय् क्यनेगु शुरु याःगु खः । थ्व स्वयां न्ह्यः न्हापा न्हापां नेवाः समुदायया ख्वातुगु बसोबास दुगु जिल्लाया थीथी थासय् नेवाःतय्सं जक थ्व प्याखं पिथनाः क्यनेगु याना वयाच्वंगु खःसा लिपांगु इलय् परम्परा ल्यंकेगु उद्देश्यं दक्वं समुदायया मंकाः सहभागिताय् प्याखं क्यनेगु शुरु यानागु वय्कलं कनादीगु दु ।
LEAVE YOUR COMMENTS