कवाड व्यवसायीयात आन्दोलनय् सुकुम्बासीया तिबः
येँ (नेपालभाषा टाइम्स)/ संवैधानिक व्यवस्था कथं व्यवसाय याये दयेमाःगु माग यासें आन्दोलन याना वयाच्वंगु कवाड व्यवसायीतय्सं म्हिगः नं येँ महानगरपालिकाया ज्याकुथी धर्ना बिउगु दु । भृकुटी मण्डपं न्ह्याःगु प्रदर्शनया झ्वलय् कवाड व्यवसायीतय्सं कमलादीस्थित येँ मनपाया ज्याकू घेरे याःगु खः ।
कवाड व्यवसायी संघर्ष समितिया अध्यक्ष रामकेवल गुप्तां सर्वोच्च अदालतया आदेश अःखः येँ मनपाया मेयर बालेन साहं कवाड व्यवसायीतय्त दुःख बियाच्वंगुलिं आन्दोलनय् कुहां वयेमाःगु खँ धयादीगु दु ।
समितिया अध्यक्ष गुप्तां धयादिल, ‘सर्वोच्च अदालतया आदेश कार्यान्वयन यायेमाःगु व जिमिसं शान्तिपूर्ण वातावरणय् व्यवसाय याये दयेमाः धइगु जिमिगु माग खः । थ्व विषयसं वारपार यानाः हे जक जिमिगु आन्दोलन स्थगित जुइ ।’
कवाड व्यवसायीतय्सं यानाच्वंगु आन्दोलनयात म्हिगः सुकुम्बासीतय्सं तिबः बिसें ब्वति काःगु दु । आम सुकुम्बासी तथा अव्यवस्थित बसोबास मोर्चाया अध्यक्ष कालबहादुर विकं कवाड आन्दोलन प्रति एक्येबद्धता क्यनाः आन्दोलनयात समर्थन याःगु खः ।
वय्कलं कवाड, सुकुम्बासी लिसें फुक्कं जानाः मेयर साहया गैरकानुनी ज्याया विरोध यायेमाःगु खँ धयादीगु दु । कानुन स्वयां च्वय् च्वनाच्वंम्ह मेयर साहयात कानुनया अधिनय् हयेमाःगु खँ नं विकं धयादीगु दु ।
थ्वहे झ्वलय् आम जनता पार्टी (आजपा) या अध्यक्ष लिसें पुलांम्ह मन्त्री प्रभु साहं येँ मनपा विरुद्ध निरन्तर आन्दोलन याना वयाच्वंगु कवाड व्यवसायीया आन्दोलनय् सरकार गम्भीर मजूगु दुःखया खँ जूगु खँ धयादीगु दु ।
वय्कलं सामाजिक सञ्जालय् च्वयादीगु दु, ‘सम्मानित सर्वोच्च अदालतया आदेशया अवज्ञा यासें महानगरं कवाड व्यवसायीयात यानाच्वंगु ज्यादती पनेत, शान्ति सुरक्षा, अमन चयन व विधिया शासनया प्रत्याभूमि बीत सकलें न्याय प्रेमीतय्सं योगदान यायेत इनाप यानाच्वना ।
LEAVE YOUR COMMENTS