भदौ महिनाय् महाधिवेशन जुइगु देउवाया बचं

येँ -संसद व सरकारय् कचवं वयाच्वंगु इलय् प्रमुख प्रतिपक्षी नेपाली कांग्रेसया सभापति शेरबहादुर देउवां पार्टीया कचवं धाःसा ज्यंका यंकेगु तयारी शुरु याःगु दु । पार्टीया महाधिवेशन गबले जुइ धकाः पार्टी दुने ब्वलनाच्वंगु न्ह्यसःयात लिसी बी कथं सभापति देउवां म्हिगः छगू वक्तव्य जारी यासें आः वइगु भदौ महिनाय् पार्टीया महाधिवेशन यानां त्वःतेगु बचं बियादीगु दु ।

वय्कलं पिकयादीगु वक्तव्यय् पार्टीया महाधिवेशन धइगु छगू प्राविधिक वा प्रशासिनक विषय जक मखुसं थ्व छगू महत्वपूर्ण राजनीतिक अभियान समेत खः धासें पार्टीयात जीवन्त याना तयेगु लागिं थ्व आवश्यक खः धइगु खँ थम्हं बांलाक थू धकाः धयातःगु दु ।

आः वइगु भदौ महिनाय् अधिवेशन जुइ लाकि मजुइ धइगु खँय् पार्टीया सुं नं नेता कायकर्ता अन्यौल मजुइत इनाप यासें वय्कलं बरु सकलें नेता कार्यकर्ता जानाः थ्व ज्या सम्पन्न याये माःगु दु धकाः नं धयादीगु दु ।

पार्टीया विधान कथं महाधिवेशन प्यदँय् छक्वः यायेमाःगु खःसा उगु म्याद क्वचायेधुंकूगु दु । उकिं आः संविधानय् व्यवस्था यानातःगु न्यादँया म्याद सम्बन्धी प्रावधानया लबः कयाः आः वइगु भदौ महिनाय् महाधिवेशन यायेगु तयारी जूगु खः । थुकी नं अझ खुला थपे जुइधुंकूगु दु ।

सूत्रतय्सं धाः कथं यदि थ्व न्यादँत्याया दुने नं पार्टीया महाधिवेशन मजुल धाःसा संविधानतः नेपाली कांग्रेस पार्टी हे अवैध घोषित जुइगु तकया सम्भावना दुगु खँ नं विज्ञ सूत्रं धाःगु दु । महाधिवेशन यायेगु फुक्क कथंया म्याद प्रयोग यायेधुंकूगु जूगुलिं आः वइगु भदौया दुने छुं नं हालतय् महाधिवेशन मयासें मगाःगु खँ नं कांग्रेस सूत्रं धाःगु दु ।

सम्बन्धित बुखँ

LEAVE YOUR COMMENTS