बेनीइ ल्याय्म्ह पुस्तायात बर्खे प्याखंया प्रशिक्षण

येँ(नेपालभाषा टाइम्स)- नेपालभाषा मंकाः खलः बेनीं ल्याय्म्ह ल्यासेतय्त लक्षित यानाः मौलिक प्याखंया प्रशिक्षण शुरु याःगु दु । मंकाः खलः बेनीं स्थानीय मौलिक बर्खे प्याखंया पुस्तारन्तरण यायेगु ल्याखं ल्याय् पुस्तायात वा पीगु (रोपाइँ) व जोगी प्याखं तालिम संचालन याःगु खः ।

मंकाः खलः बेनीया न्वकु कविर श्रेष्ठं बेनीया मौलिक बर्खे प्याखं हुलीपिं कलाकारया अभाव जुइवं स्कुलय् आखः ब्वनीपिं ल्याय्म्ह पुस्तायात तालिम बियागु जानकारी बियादिल । स्थानीय मौलिक बर्खे प्याखंया सीप व कला पुस्तान्तरण यायेगु तालिमया मुख्य उद्देश्य जूगु नं वय्कलं कनादिल ।

वंगु भदौ १८ गतेनिसें न्ह्याःगु तालिम असोज १ गतेतक न्ह्याइ । बेनी नगरपालिका वडा ७ व ८या ग्वाहालिइ न्ह्यानाच्वंगु तालिमय् बेनीया स्वंगू विद्यालयया न्यय्म्ह स्वयां अप्वः ल्याय्म्ह ल्यासेतय्सं प्रशिक्षण कयाच्वंगु दु । न्वकु श्रेष्ठं कनादीकथं वा पीगु प्याखंया निंतिं स्वीम्ह व जोगी प्याखंया निंतिं झिम्ह कलाकारया आवश्यक जुइ ।

मंकाः खलः बेनीया पुलांम्ह नायः राजेन्द्रकुमार श्रेष्ठं कनादीकथं थ्यंमथ्यं निसः दँ न्ह्यःनिसें दँय्दसं बेनी बजारय् लछितक क्यनेगु याना वयाच्वंगु बर्खे प्याखनय् प्याखं ल्हुइपिं कलाकारया अभाव जुइवं न्हू पुस्तायात सीप लःल्हायेगु कुतःकथं प्रशिक्षण शुरु याःगु खः । वय्कलं पुलांपिं कलाकारत तसकं ज्याथः जुइधुंकूगुव गुलिखे मदया नं वनेधुंकू नापं विदेश वंगु व न्हू पुस्ताय् संस्कृति हस्तान्तरण मजूगलिं कलाकारया अभाव जक मखसे मौलिक संस्कृति हे लोप जुइ अवस्थाय् थ्यंगु दु धयादिल ।

थ्व स्वयां न्ह्यः नेवाः समुदायया मिजंतय्सं जक ल्हुइगु याना वयाच्वंगु बर्खे प्याखं लिपांगु इलय् मिसापिं लिसें मेमेगु समुदायापिंत नं दुथ्याकाः प्याखं क्यनेगु याना वयाच्वनागु पुलांम्ह नायः श्रेष्ठं कनादिल ।

थुगुसी बेनी बजारय् लाखे प्याखं, सल प्याखं, नागनागिनी, द्वँह प्याखं, वा पीगु प्याखं, वामा प्याखं क्यनेगु ग्वसाः दुगु मंकाः खलः बेनीं जानकारी बिउगु दु ।

नेवाःतय् बाहुल्यता दुगु बेनी बजारय् वा पी सिधयेकाः गथांमुगःनिसें चथाः तक प्याखं क्यनेगु याना वयाच्वंगु दु ।