बलम्बुइ महालक्ष्मी जात्रा
येँ(नेपालभाषा टाइम्स)- स्वनिगःया हे प्राचीन व महत्वपूर्ण जात्राकथं कयातःगु बलम्बु महालक्ष्मी द्यःया जात्रा शुरु जूगु दु । चन्द्रागिरि नगरपालिकाया बलम्बुइ जुइगु थ्व जात्राय् स्थानीय नेवाः समुदाय जक मखसे मेमेगु समुदाययापिं नं थ्व जात्रालिसे स्वानाच्वंगु दु ।
बलम्बु महालक्ष्मी द्यःया जात्राया अनेक मौलिक पक्षत दया वयाच्वंगु दु । स्वनिगलय् मेमेथाय् हनीगु जात्रा अप्वःथें ज्वःलाःगु खने दुसा बलम्बु महालक्ष्मी द्यःया जात्रा धाःसा गाक्कं बिस्कं पह दु । स्थानीतय्सं थ्व जात्रायात ‘ला ति म्हः’ जात्रा नं धायेगु याः । स्थानीयतय्कथं ला, लाया ति व जा छानाः जात्रा याइगु जूगुलिं ला ति म्हः जात्रा धायेगु याइगु खः । जात्राय् द्यःपिंत ला, लाया ति व जा छायेगु चलन दु ।
मुखःअस्टमिनिसें शुरु जुइगु जात्राय् न्हापांगु दिं छ्वयला बू यानाः थ्वकुन्हु नेवाः समुदायं थःगु मौलिक परिकार छ्वय्ला, तःखाः, अय्लाः दयेकाः पाहांपिंत नकेगु याइ । महालक्ष्मी द्यःया जात्रा गन गन जुइ, अन अन हे थःथिति, पाहांपिंत सःताः नकेगु चलन दु । बलम्बु महालक्ष्मी द्यःया जात्राया मुख्य जिम्मेवारी थाकुलि, दुवाः गुथि व प्याखं खलकं कया वयाच्वंगु दु । नवमिया दिंयात ‘तयारी दिं’ धाइ । थ्वकुन्हु नं पाहांपिं सःताः नकेगु व सांस्कृतिक ज्याझ्वः जुइ ।
जात्राया मुख्य दिं दशमिकुन्हु खः । थ्वकुन्हु सुथ न्हापां गुम्ह गुथ्याःत सुनानं मखंक मठय् वनाः कुमारिया पुजा याइ । थन पुजा सिधयेकाः इपिं सकलें नासःद्यःया पुजा यायेत वनी । अनंलि न्हय्म्ह गुथ्याःत वयाः कुमारिया प्रतिमायात नासःद्यःया देगलय् यंकाः दुवाः गुथिया गुम्ह गुथ्याः महालक्ष्मीया पुजा यायेत वनी । महालक्ष्मी द्यःया पुजा याइगु इलय् द्यःया छ्यनं स्वांछफ्वः कुतुं वइगु व अनंलि दशमिया जात्रा विधिवत शुरु जुइ धइगु मान्यता दया वयाच्वंगु दु ।
LEAVE YOUR COMMENTS