स्वम्ह हस्तीयात नेवाः अधिकार सिरपाः
येँ – नेवाः जातिया राजनीतिक अधिकार प्राप्तीया आन्दोलनय् ताः ई न्ह्यवंनिसें योगदान बिया वयाच्वंपिं स्वम्ह नेवाः हस्तीयात थुगु दँया नेवाः अधिकार सिरपाः लःल्हाइगु जूगु दु ।
नेवाः अधिकार सिरपाः गुथिया नकतिनि च्वंगु मुँज्यां नेवाः न्ह्यलुवापिं प्रा. माणिकलाल श्रेष्ठ, जनकवि दुर्गालाल श्रेष्ठ व मानव अधिकारकर्मी मल्ल के. सुन्दरयात थ्व सिरपाः लःल्हायेगु निर्णय याःगु खः ।
नेवाः अधिकार सिरपाः म्हतिं ५० द्वः (५० हजार) तका व दसिपौ सहितया खः । थ्वहे वइगु चिल्लागा ३ (चैत्र ८ गते) शनिवाः कुन्हु येँय् छगू ज्याझ्वः यासें थ्व सिरपाः लःल्हायेगु ज्याझ्वः दुगु खँ नेवाः अधिकार सिरपाः गुथिया नायः डा. महेशमान श्रेष्ठं कनादीगु दु ।
नेवाः जातिया राजनीतिक अधिकार प्राप्तीया आन्दोलनय् छगू दशक स्वयां ताःई निसें योगदान बिया वयाच्वंपिं व्यक्ति वा संस्थायात थ्व सिरपाः बीगु याना वयाच्वंगु दु ।
प्रा. माणिकलाल श्रेष्ठ, जनकवि दुर्गालाल श्रेष्ठ व नेवाः न्ह्यलुवा मल्ल के. सुन्दरं वंगु न्यागू दशक स्वयां नं न्ह्यवंनिसें नेवाः जक मखु नेपाःया आदिवासी जनजाति आन्दोलनयात हे वैचारिक व सांगठनिक कथं नेतृत्व बियाः न्ह्याका वयाच्वनादीगु दु ।
LEAVE YOUR COMMENTS