प्रमयात रास्वपाया गुहार

येँ (नेपालभाषा टाइम्स)- राष्ट्रिय स्वतन्त्र पार्टीया नेता लिसें कार्यवाहक अध्यक्ष डीपी अर्याल व प्रमुख सचेतक सन्तोष परियारं म्हीग बहनी प्रधानमन्त्री केपी शर्मा ओलीयात व म्हिगः गृहमन्त्री रमेश लेखकयात नापलाःगु घटनायात अर्थपूर्ण रुपं काःगु दु ।

सहकारी ठगी काण्डय् ज्वनातःम्ह रास्वपाया सभापति रवि लामिछान बारे खँ ल्हायेत अर्याल व परियार बालुवाटार वंगु खः । उगु इलय् रास्वपाया नेतातय्सं लामिछानेप्रति नरम नीति कायेत इनाप याःगु खँ सूत्रं धाःगु दु ।

रास्वपा नेतातय्सं सरकारं पूर्वाग्रह तःगु खः कि धइगु थःपिंत ताःगु धासें भचा बिचाः यायेत आग्रह याःगु खः । लिसलय् प्रम ओलीं लामिछानेयात ज्वंगु खँय् सरकारया भूमिका मदुगु व कानुनी प्रक्रियाय् पंगः थनेगु खँ थःत स्वीकार्य मजूगु ख्याच्वः बियादीगु खः । प्रतिवादीयात त्वःतकेत सांसदत सतकय् वःगु खँय् आपत्ति प्वंकादिसें वय्कलं कानुनयात थःगु कोर्शय् वंके बी नु धकाः इनाप यानादीगु खः । प्रधानमन्त्रीया लिसः लिपा रास्वपा नेतात निराश जुयाः लिहां वःगु खँ धाःगु दु । उकथं हे म्हीग अर्यालं गृहमन्त्री रमेश लेखकयात नं नापलाःगु खः । अन छु खँ जुल धइगु खँ धाःसा पिहां मवःनि । अर्यालं धाःसा म्हिगः बालुवाटार केन्द्रित आन्दोलन जूगुलिं शान्ति सुरक्षाया बारे खँल्हाबल्हा जूगु खँ धयादीगु दु ।

थ्वहे झ्वलय् रास्वपाया अध्यक्ष लामिछानेयात कयाः पोखराया सूर्य– दर्शन सहित मेगु न्यागू सहकारीपाखें नं बचतकर्ताया ध्यबा घोटाला याःगु प्रकरणय् अनुसन्धान याइगु जूगु दु । नेपाल प्रहरीया कथं कास्कीइ जुयाच्वंगु अनुसन्धान क्वचायेवं मेगु सहकारी ठगी प्रकरणय् नं अनुसन्धान न्ह्याकी ।

लामिछाने प्रबन्धक निर्देशक जुयाच्वंगु गोरखा मिडिया नेटवर्कपाखें सञ्चालन जुयाच्वंगु ग्यालेक्सी टेलिभिजनय् सूर्यदर्शन लगायत न्यागू सहकारीया ध्यबा लगानी जूगु खनेदुगु खः । अनुसन्धानय् दुथ्याःम्ह प्रहरी अधिकृतया कथं सूर्यदर्शन लिपा येँया स्वर्णलक्ष्मी, चितवनया सहारा चितवन बहुउद्देश्यीय सहकारी संस्था, वीरगञ्जया सानो पाइला व नेपालगञ्जया समानता सहकारी संस्थाया बचतकर्ताया ध्यबा अनियमितता जूगु खँयात कयाः नं अनुसन्धान यायेगु तयारी जुयाच्वंगु दु । थ्व न्यागुलिं सहकारीपाखें गोरखा मिडियाय् २२ करोड ४६ तका दां यंकातःगु खँ धाःगु दु ।