ने. सं. ११४४ कौलाथ्व चौथी -

जनगायक भृगुराम श्रेष्ठ मंत, कन्हय् ल्हुतिइ अन्त्येष्टि याइगु

येँ (नेपालभाषा टाइम्स)-नेपाल भाषा संगीत ख्यःया ज्वःमदुम्ह गायक लिसें कलाकार भृगुराम श्रेष्ठ आइतवाः मंत । वंगु ताः ई न्ह्यवंनिसें क्यान्सर ल्वचं ग्रस्त जुयाः वय्कः थनया वीर अस्पतालय् वासः याकाच्वंम्ह खः । तच्वः जुयाःलि सनिलया ५ः४५ बजे वय्कः मदुगु खः । वय्कः ९२ दँ दुम्ह खः । ने.सं. १०५३ स बौ आशाराम श्रेष्ठ व मां सानुनानी श्रेष्ठया कोखं येँया त्यःर तुम्बहालय् वय्कः जन्म जूगु खः ।

वय्कलं हालादीगु ‘द्यःयात सिन्हाय् स्वां…’, ‘थौं वइ ला कन्हय् वइ ला..’ नेपालभाषाया अतिकं लोकंह्वाःगु म्ये खः । वय्कलं संगीत व गायनया माध्यमं नेपालभाषा आन्दोलनयात हे आपालं तिबः बियादीगु दु । वि.सं. २०२२ सालय् जूगु भाषा आन्दोलनय् नं हरेक साहित्यिक ज्याझ्वलय् वय्कलं म्ये हालादीगु खः ।

उगु इलय् वय्कलं हालादीगु ‘झीगु भाषा मन्त धाःसा..’, ‘झीगु खः नेपाल संवत्…’ म्ये थौं तक नं उलि हे लोकंह्वाःनि । वय्कलं अप्वः यानाः जनकवि दुर्गालाल श्रेष्ठलिसे जानाः आपालं म्ये हालादीगु दुसा निम्हं जानाः आपालं दबू प्याखं नं म्हितादीगु दु । लोकम्येया लागिं वय्कःयात करुणाकर सिरपाः नं देछानातःगु दु । छुं ई न्ह्यः तिनि वय्कःयात सार्वजनिक अभिनन्दन यासें ‘जनगायक’ उपाधि लःल्हायेगु ज्या जूगु खः ।

मदुम्ह भृगुराम श्रेष्ठया निम्ह काय् दी । वय्कः ‘सिलु’ प्याखंया नांजाःम्ह नायिका मदुम्ह नविना श्रेष्ठया नं अबु खः । छेँजःपिंसं धाः कथं सोमवाःं थनया ल्हुतिइ वय्कःया अन्त्येष्टि याइगु ग्वसाः दु ।