सक्वय् नं न्हूदँ समारोह समिति

सक्व- नेपाल संवत् ११४२ न्हूदँ तःजिक हनेत सक्वय् नं न्हूदँ समारोह समिति नीस्वंगु दु । सक्व न्हूदँ समारोह समिति ११४२ या नायःकथं भाषासेवीलिसें नेपाल लिपि गुथिया प्राज्ञ माधव स्यस्यःयात ल्यःगु दु ।

सक्वय् थीथी झिंछगू त्वालं पालंपाः पाः कयाः न्हूदँ हनेगु याना वयाच्वंगु दु । थ्व ल्याखं थुगुसी साल्खा त्वाःया पाःलाःगु व उगु त्वाःयाम्ह हे नायः ल्ययेगु परम्पराकथं भाषासेवी स्यस्यःयात नायः ल्यःगु खः ।

नायः श्रेष्ठं बियादीगु जानकारीकथं आकिवं चलाखु त्वालं पाः काइगु जूगुलिं उगु त्वाःयातछ्याञ्जेया भाला बिउगु दु । थगुने लप्सीफेदीं पाः काःगु इलय् स्यस्यः छ्याञ्जे जुयादीगु खःसा थगुने पाःकाःगु त्वाःया नायः भिंतुना मल्ल श्रेष्ठं थुगुसीया नायः श्रेष्ठयात पदभार नं हस्तान्तरण यानादीगु खः ।

थन न्हूदँ समारोह समितिइ पाः काइगु थीथी झिंछगू त्वालं हे समितिइ दुजः ल्ययेगु परम्परा दुगु नं वय्कलं जानकारी बियादिल । थ्व ल्याखं चलाखु, पालुबारी, दुगाहिति, सुन्त्वाः, ईपा त्वाः ईल्ला त्वाः, चुगां, पुखुलाछि, धुँला, लप्सीफेदी व साल्खा त्वालं छम्ह छम्ह प्रतिनिधि दुजःकथं ल्ययेगु ज्या नं जूगु नायः श्रेष्ठं कनादिल ।

सक्वय् न्हूदँया लसताय् दँय्दसं थें थुगुसी नं साय्मि पुचःपाखें सीइताः मतयाः व सक्व जेसिजया ग्वसालय् भिंतुना मोटरसाइकल ¥याली जुइगु जूगु दु । अथे हे वइगु शनिवाः समितिया ग्वसालय् सक्वय् हे न्हूदँया लसताय् तुच्चा ज्याझ्वः नं जुइगु नायः श्रेष्ठं ‘नेपालभाषा टाइम्स’यात जानकारी बियादिल ।